– Det var ei delt glede å sjå sonen min igjen i dag, seier Trude Brosvik spøkefullt.
Det er likevel fullt alvor på landsmøtet til KrF fredag, og det er også alvor i at dei to familiemedlemmane er rykande ueinige i kva retning partiet dei er så glad i bør ta framover. Partiet bestemte seg fredag for å gå mot høgre.
– Det var ei dårleg avgjerd. Eg synest det er forferdeleg at vi bryt vallovnaden vår om å ikkje gå inn i regjering med Frp, seier Brosvik.
– For meg er det viktig å sjå på dei sakene der vi faktisk har fått gjennomslag dei siste fem åra. Det tyder på at det er mykje å hente på høgresida framover, seier Torbjørn Brosvik, delegat for Hordaland KrF på landsmøtet.
– No får eg svi for fri oppdragelse
Han er ikkje i tvil om at KrF bør gå inn i dagens regjering. Mor hans er slett ikkje einig.
– Eg synest ikkje gjennomslaga våre med dagens regjering er så imponerande. Å gå i regjering med Frp ville vore eit alvorleg løftebrot, seier Trude Brosvik, delegat for Sogn og Fjordane KrF på landsmøtet.
Avstanden mellom dei to i familien Brosvik illustrerer kanskje korleis to lokalpolitikarar i KrF kan ha ei total ulik verkelegheitsoppfatning, sjølv om dei kjempar for det same partiet.
Mor og son Brosvik påstår at stemninga framleis er god i familien deira. Når dei får spørsmål om korleis dette går ut over familieidyllen, pratar dei to i munnen på kvarandre.
Begge ler, og så fortel Torbjørn:
– Dette er slik det brukar å vere rundt kjøkenbordet vårt. Når eg pratar med mor mi er det veldig mykje politikk det går i, så dette er heilt normalt, seier Torbjørn Brosvik.
– Ja, no får eg svi for «fri oppdragelse», ler Trude Brosvik.
Trur partiet kan kome styrka ut av avgjerda
Fleire aktive i KrF har frykta korleis det går med samhaldet i partiet etter den opprivande prosessen dei no har lagt bak seg.
Begge dei to Brosvik-delegatane er samde om at det skal gå bra med både familien og partiet uansett kva avgjerd ein landar på fredag.
– Eg trur faktisk partiet kan kome styrke ut av dette. Mange har lurt på kva retning KrF skal ta, og no treng ikkje folk å lure på det meir, seier Torbjørn Brosvik.