Hopp til innhold

Mor og barn døydde etter brann

Den 24 år gamle kvinna og sonen hennar på 20 månader døydde av skadane dei fekk i brannen i Førde måndag ettermiddag.

Husbrann i Førde

FULL UTRYKKING: Alt tilgjengeleg mannskap blei send ut då alarmen gjekk. To personar blei kritisk skadde i brannen.

Foto: Ole Andre Rekkedal / NRK

Dei to blei kritisk skadde i brannen og frakta til Haukeland Universitetssjukehus med helikopter.

– Mora døydde tysdag kveld og barnet døydde i dag tidleg, seier lensmann Jan Egil Tvinde ved Førde og Naustdal lensmannskontor.

Blei berga ut av naboar

Brann i Førde

LEITA ETTER PERSONAR: Røykdykkarar gjennomsøkte huset etter at brannen var sløkt.

Foto: Ole Andre Rekkedal/NRK
Brannetterforsking i Førde

ETTERFORSKAR: Politiet har drive taktisk og teknisk etterforsking etter brannen.

Foto: Bård Siem / NRK

Det var måndag ettermiddag at politi og brannvesen fekk melding om brannen i huset kalla Mølla på Steinen i Førde. Det byrja å brenne i hovudetasjen i det treetasjes huset.

Kvinna og sonen hennar blei raskt berga ut av naboar som kom til og brannen blei sløkt etter ti minutt.

Dei to hardt skadde fekk alvorlege brannskadar og blei sende frå Førde sentralsjukehus til brannskadeavdelinga ved Haukeland. Tilstanden har heile tida vore kritisk, og livet stod ikkje til å redde.

Fleire personar blei lettare skadde i samband med redningsarbeidet og måtte til behandling på sjukehus.

Veit enno ikkje årsaka

Det bur 27 asylsøkjarar frå forskjellige nasjonar i huset som inneheld fleire leilegheiter. Dei blei evakuerte til andre stader i Førde.

Kriminalteknikarar har jobba på staden for å finne ut kva som kan ha starta brannen. Politiet etterforskar også saka taktisk.

Lensmann Jan Egil Tvinde kan enno ikkje seie noko om årsaka til brannen.

Innholdet som skulle vises her støttes dessverre ikke lenger.