Trelast stengde to E16-tunnelar i Aurland

To tunnelar vart stengde då ein lastebil mista trelast i Gudvangatunnelen på E16 gjennom Aurland.

Kø retning Voss ved Langhuso i Aurland

KØ: Det danna seg kø ved Langhuso då Gudvangatunnelen vart stengd tidleg torsdag ettermiddag.

Foto: Webkamera / Statens vegvesen

– Det var nummeret før vi også måtte stengje Fretheimtunnelen, seier trafikkoperatør Jan Erikstad ved Vegtrafikksentralen i Lærdal.

Vegtrafikksentralen fekk melding om uhellet like før klokka 12. Då hadde ein personbil køyrt inn i nokre av plankane som ein lastebil mista kring halvveges inne i den 11,5 kilometer lange tunnelen.

For å unngå køar i Flenjatunnelen vart også denne rutinemessig stengd. Med stor trafikk var det like før at også ein tredje tunnel måtte stengje.

– Mange har nok teke langhelg, og det var stor trafikk også i går. I dag har det vore stor trafikk, spesielt frå Bergen, så det vart lange køar, seier Erikstad.

Etter kring ein time vart tunnelane opna att for fri ferdsle.

– Det var snakk om noko lite som hadde falle av, men det var likevel nok til at ein bil køyrde i og punkterte, seier Erikstad.

Erikstad sin kollega ved Vegtrafikksentralen i Bergen, Kjetil Larsen, meinte føraren av lastebilen truleg ikkje merka at plankane fall av.

– Vi har kalla ut entreprenør for å sjekke kor mykje som har falle av. Viking er også rekvirert for å hente personbilen, sa han.

Operasjonsleiar Frode Kolltveit ved Vest politidistrikt seier at dei ikkje har sendt patrulje til staden, og at dei avventar tilbakemelding frå Vegtrafikksentralen.

Laster kart, vennligst vent...

STENGD: Eit større køyretøy har mista fleire treplankar kring fem kilometer inne i Gudvangatunnelen.