Mista sin eigen norske rekord på heimebane - men svergar revansj torsdag

– Eg kan ikkje vere veldig nøgd med dette, seier florøværingen, etter å ha vorte klokka inn på 50,39 under Florø friidrettsfestival laurdag.

Kjerpeset gjorde isolert sett eit godt løp og stod distansen heilt ut, men mot Warholm, som suste inn på 49,62, heldt det berre ikkje. Dermed rauk både sigeren, men også Kjerpeset sin gamle rekord på 49,95 frå 2013.

– Eg ville så gjerne vinne her i dag, men det klarte eg ikkje. Og det var dumt. Warholm er heilt rå, eg er heilt imponert, seier Kjerpeset om sunnmøringen frå Dimna.

• Les også: No satsar han mot OL: - Aldri vore i så bra form

Kan springe fortare

Men han er slett ikkje ein slagen mann av den grunn.

– Eg ser ingen grunn til at ikkje eg skal kunne springe like fort eller fortare, seier Kjerpeset, som meiner tida til Warholm er fantastisk bra.

– Eg hadde ikkje venta at han skulle springe så bra, seier Kjerpeset.

Men å miste sin eigen norske rekord på heimebane, er surt.

– Det hadde eg ikkje lyst til, men det er motivasjon. Eg skal ta att rekorden. Det kan skje allereie torsdag på Bislett Games, seier Kjerpeset.

• Les også: Her har friidrettsgenet bite seg fast i familien

Treng å finpusse siste del av løpet

Det er små justeringar som må til for at han skal få tida ytterlegare ned.

– Det er siste delen av løpet som må sitje betre. Eg blir litt defensiv i svingen og då får han eit forsprang som eg ikkje klarar å dekke, seier Kjerpeset.

Han meiner dette er småting som kan fiksast.

– Det er berre småting. Eg er i form og har grunnlaget, så nå må eg berre finpusse, seier Kjerpeset.

• Les også: Denne pokalen har samla støv i 13 år

Lovar kamp til døra

Karsten Warholm er godt nøgd med å ha sett norsk rekord.

– Dette er noko eg har jobba for, og har trent godt og mykje i vinter. Det er ei god kjensle å lukkast, seier Warholm.

At Kjerpeset vil ta att rekorden på torsdag, tek Warholm som ei utfordring.

– Han kan heilt sikkert klare det han vil. Men eg skal prøve å ikkje gjere det så altfor lett for han, smiler Warholm, som tykkjer 49,62 er ei god tid.

– Klarar eg å gjere det same i EM og liknande, så kan det bli bra. Det er ikkje langt frå OL-kravet, seier Warholm, som trur både han og Kjerpeset kan få OL-billett – ved å pushe kvarandre.

– Det er slik ein må tenkje for å få norsk friidrett til nye høgder. Målet for oss begge er å prestere på topp internasjonalt, og då må vi hjelpe kvarandre litt, seier Warholm.