«Ho hadde alltid eit smil om munnen»

– Eg kjende ho via stallmiljøet her i Årdal. Ho var ei veldig snill og grei jente. Ho stilte opp på dugnader og det som skulle vere, seier Malin Hovland.

For 20-åringen var det ein vond dag i stallen i Seimsdalen i Årdal i dag.

Hestar og riding var den store interessa til Margaret Molland Sanden, og ho har i årevis vore del av det levande hestemiljøet i Årdal.

– Ho har alltid vore her i stallen, så vi har no trakka her nokre år i lag, seier Hovland.

• LES OGSÅ: Mista kollega i går, sit bak bussrattet i dag
• LES OGSÅ: Fekk asylavslag i juni - men var framleis i Norge fem månader etter

Var ei kjempejente

Ho fortel om ein jente som sjeldan sa nei, som tykte det var kjekt å vere med, og som var lidenskapleg oppteken av hest og det som følgde med.

– Ho var ei livleg, blid jente. Ho hadde alltid eit smil om munnen, og jobba hardt for det ho ville og framtida. Ho tok godt vare på hesten sin, var ei kjempejente, eg har berre gode ting å seie om henne, seier Hovland.

Ho fortel at Sanden i tillegg til å vere svært glad i hestar, også var svært flink.

– Ho var ikkje redd for noko, og kasta seg ut i det. Ho har til dømes gjort ein super jobb med hesten sin, seier Hovland.

• LES OGSÅ: Blir oppmoda om å gå med sørgeband
• LES OGSÅ: Margaret (19) frå Årdalstangen blant dei drepne

Var eit naturtalent

I ein av stallboksane står varmblodshesten Passe Partout og ser ut stalldøra. Den kastanjebrune hesten var den store interessa til Margaret.

– Ho hadde eit veldig godt forhold til hesten, ho var veldig knytt til han, seier Hovland.

At Sanden var eit naturtalent med hest, kom godt med. For trass i kallenamnet til hesten, "kylling", var han ikkje alltid like lett å ha med å gjere.

– Han var ikkje den lettaste å handtere, men han er vorten ein veldig fin hest. Ho har gjort ein veldig god jobb. Han er så snill og roleg å ha med å gjere. Ho hadde eit spesielt lag med hestar, seier Hovland.

(Artikkelen held fram under biletet)

• LES OGSÅ: Politiet valde lang omveg - ambulansane kom fram ein time før
• LES OGSÅ: Drapsmannen er ikkje avhøyrt

Heile miljøet er prega

– Det er ei tragedie. Slikt skulle ikkje skje. Ho fortente det verkeleg ikkje. Vi har mista ein stor person her i ridemiljøet, seier Hovland.

Ho fortel at medlemmene i ridemiljøet på Tangen køyre- og rideklubb skal samlast i ettermiddag for å snakke.

– Mange er nok i sjokk. Vi veit ikkje heilt kva vi skal tru og gjere. Det er viktig at vi held saman. Så får vi finne ut kva vi skal gjere vidare, seier Hovland.

Ho fortel at hendinga pregar alle i hestemiljøet i tillegg til lokalsamfunnet i Årdal.

– Alle visste kven Margaret var. Ho var med på mykje, og ei artig og blid jente som spreidde glede. Det er ufatteleg at det kan skje her i vesle Årdal. Det skal jo liksom vere trygt. Men no kan alt skje, seier Hovland.

Det er oppretta ei minneside for Margaret Molland Sanden på Facebook. I løpet av tre timar har sida nesten 11.000 følgjarar.

(Artikkelen held fram under biletet)

Ryttarkrinsen mista to på få dagar

Sogn og Fjordane Ryttarkrins er også prega av hendinga. Sanden var ungdomsmedlem i styret. Ryttarkrinsen har i løpet av få dagar mista to av sine kjære.

Førre helg omkom Aud Jorunn Frøysadal i ei trafikkulykke mellom Horten og Tønsberg. Måndag vart Margaret Molland Sanden knivdrepen då ho skulle ta Valdresekspressen tilbake til Oslo der ho studerte.

– Dette er berre frykteleg trist, seier krinsleiar Linda Natvik til NRK.no.