Minister opnar gardsbrenneri

Besøket startar måndag kveld på Ciderhuset i Balestrand der Brekk skal opne det nye brenneriet som skal destillere brennevin av lokalproduserte epler.

– Vi har arbeidd i mange år med å etablere oss og å opprette økologisk frukthage. Eg trur det blir veldig kjekt. Det er hyggjeleg å få besøk av ein minister, for det viser at det vi har arbeidd med blir lagt merke til, seier Høyvik til NRK.no.

(Artikkelen held fram under biletet)

Hundre gjestar

Høyvik og ektemannen Åge Eithungjerde flytta heim til Balestrand i 1989 for å overta besteforeldra til Åge sin frukthage. No har dei endeleg fått draumen sin oppfylt, og brenneriet som skal nyttast til produskjon av fruktbrennevin skal opnast under ministerbesøket. Dei har tidlegare drive med ciderproduksjon i tre år.

– Vi har invitert over hundre gjestar, så dette blir kjekt. Det blir drikke i glasa og det blir mat på bordet. I tillegg blir det konsert med Sigrid Moldestad og Gabriel Fliflet, seier Høyvik.

Etter litt alkoholinntak og kulturell underhaldning skal landbruksministeren få lov å opne brenneriet.

Vil diskutere politikk

Men det blir ikkje berre fest og moro under opningsfesten. For ekteparet vil nemleg diskutere alkoholpolitikk med ministeren.

– Vi kan berre selje drikkevarene våre til Vinmonopolet og til dei med skjenkeløyve. Vi kan ikkje selje drikka vår til besøkande. Det er ikkje lov i dag, og det vil vi få ei endring på, seier Høyvik.

Ho viser til at det er vanleg å kjøpe med seg vinflasker når turistar og andre vitjar vingårdar i til dømes Frankrike.

Får smake, men ikkje kjøpe

– Folk får smake på drikka, men dersom dei spør om dei kan kjøpe ei flaske eller to, må vi seie nei. Slik som lovverket er i dag så har vi ikkje lov å selje flasker som folk kan ta med seg. Dette vil ta opp med ministeren, seier Høyvik.

Tysdag går turen til Brekk vidare til Leikanger med vandring i kulturlandskap i området Grinde-Engjasetet og besøk hos ein av Sogns mange bringebærprodusentar.