– Dette er ekstremt alvorleg. Vi har ikkje meir å kutte på

– Skatteinngangen til kommunane er så langt i år mindre enn venta, seier seniorrådgjevar Kåre Træen hos Fylkesmannen.

For Selje kommune utgjer dette halvannan millionar kroner og dette er krevjande for kommunen.

– I tillegg kjenner vi til at Selje har store utfordringar frå før med store akkumulerte underskot som skal dekkast inn i 2014 og framover, seier Træen.

– Ekstremt alvorleg

Træen seier at for kommunar som i tillegg har nedgang i folketalet, blir utfordringane endå større. Selje kommune er ein av dei som har størst utfordringar.

Setjeordførar Ottar Nygård er uroa over situasjonen dei har hamna i.

– Dette er ekstremt alvorleg. Eg trur Selje kommune er den som har den vanskelegaste økonomien og dei største utfordringane, seier Nygård.

• LES OGSÅ: Stadig fleire elevar får spesialundervisning - gir dårleg kommuneøkonomi skulda

Trur samarbeid er løysingar

Han seier dei alt har lagt ned skule og barnehage på Ytre Stadlandet, og brukt ostehøvelen grundig på alle sektorar.

– Vi har ikkje meir å kutte på og det trur eg Fylkesmannen er smerteleg klar over. Eg ser ikkje anna enn at Fylkesmannen må vurdere ekstra skjønsmidlar for å kompensere på den situasjonen vi er oppe i.

Dersom Selje i framtida skal kunne gje tenester på line mad andre kommunar i landet, ser Nygård berre to vegar.

– Anten må vi få høgare løyvingar eller så må vi inn i eit kommunesamarbeid eller samanslåing som kan kompensere for det, seier Nygård.