– Det blir ein vinterstorm med mykje vind og nedbør som regn, sludd og snø. Skal du ferdast i fjellet, må du vere budd på vanskelege køyreforhold. I lågare strøk får ein sterk vind, seier meteorolog Martin Granerød.
Verst blir det på Vestlandet og i fjellet i Sør-Noreg. Her vil det blåse opp mot full storm frå onsdag ettermiddag.
– Vi får frå liten til full storm ute ved kysten. I utsette strøk kan ein få sterke vindkast frå 25 til 35 m/s. Dette vil auke på frå onsdag ettermiddag, seier Granerød.
Meteorologisk institutt har sendt ut OBS-varsel om kraftig vind og vanskelege køyreforhold for Vestlandet sør for Stad og for fjellet i Sør-Noreg. For Rogaland og Agder er det sendt ut OBS-varsel om stor snøskredfare.
I Bergen har det vore kaos på vegane i morgontimane. Vinterstormen gjer at meteorologen åtvarar mot å ferdast i fjellet.
– Det blir eit døgn med mykje vêr. Eg ville ikkje tatt turen over fjellet det neste døgnet, seier Granerød.
Vêrvinnarane denne veka er Østlandet, Troms og Finnmark.
Dette er status på fjellovergangane:
E6 Dovrefjell – Snø- og isdekke
E16 Filefjell – Snø- og isdekke.
E134 Haukelifjell – Kolonnekøyring.
Riksveg 7 Hardangervidda – Stengt på grunn av uvêr.
Riksveg 9 Hovden-Haukeli – Snø- og isdekke.
Riksveg 13 Vikafjellet – Stengt på grunn av uvêr. Ny vurdering 16.februar.
Riksveg 15 Strynefjellet – Snø- og isdekke.
Riksveg 52 Hemsedalsfjellet – Snø- og isdekke.
Fylkesveg 50 Hol-Aurland – Snø- og isdekke.
Fylkesveg 53 Årdal-Tyin – Snø- og isdekke.
- Les også: