– Dette er eit eksempel på ein av svakheitene i dagpengeregelverket, seier stortingsrepresentant for Venstre, Sveinung Rotevatn.
Arbeidsledige sjøfolk må sjølve betale for å fornye dyre sertifikat, som dei er avhengige av for å få seg ny jobb. Før året er omme må 23 000 sjøfolk oppdatere sertifikata, som arbeidsgjevar vanlegvis betalar for. Men i dagens arbeidsmarknad er mange permitterte eller oppsagde, og dermed blir dei ståande utan sertifikat og utan jobb.
– For mange verkar det lite rimeleg, og det syns eg også, seier Rotevatn.
NAV er klare på at dei gjer ei vurdering frå sak til sak. Det er ikkje automatikk i at NAV skal betale resertifisering for arbeidslause sjømenn.
RÅKA: Sigve Vårdal Itland gjekk lenge arbeidslaus fordi han mangla naudsynt sertifisering. For å få på plass dei dyre sertifikata og kome seg i jobb att måtte han gå langt. – Eg sjølv måtte gjere ein del omprioriteringar, og mellom anna selje huset mitt, fortalde han til NRK.
Foto: Borgar Sagbakken / NRKNorsk Sjømannsforbund opplyser at kvart kurs kostar mellom 5000 og 20 000 kroner. Kor mange kurs kvar enkelt treng varierer, og i tillegg kjem utgifter til reise og opphald.
Håpar på rask avklaring
– Hovudkriteriet er om dette er naudsynt. Er det naudsynt med denne kvalifiseringa for å kome i jobb. Aukar dette jobbsjansane, og er dette noko arbeidsgjevarane spør etter, sa Arbeids- og tenestedirektør i NAV, Kjell Hugvik til NRK tidlegare.
Stortingspolitikaren vil no ta saka opp med regjeringa for å sjå kva ein kan gjere for å finne ei løysing.
– Eg må sette meg inn i saka og sjå om regelverket er haldbart. Eg vil stille spørsmål til regjeringa og høyre kva vurdering arbeidsministeren gjer. Er det mogleg å gjere dette på ein betre måte?
Han håpar at dette er ei sak ein kan få ei rask avgjerd på.
– Dersom det er enkelt å løyse så kan det sikkert skje ganske fort. VI har kasta oss rundt mange gonger det siste halvåret.
