– Oppgradering av fortau i andre byggfelt og av vegar utanfor feltet, som ikkje høyrer til sjølve bygginga er eit døme. Eit anna er i Hafstad bydel der husbyggarane må betale for bru over til E39. Er det ei kommunal oppgåve å bygge brua eller er det huskjøparane si, spør dagleg leiar i Gravdalgruppa, Bodil Kidøy Lunde.
Etterspurnaden etter bustadar i Førde og fleire andre kommunar er større enn tilbodet. Tidlegare i veka diskutere fleire aktørar i Førde kommune for å diskutere bustadsituasjonen. Lunde meiner kommunen sit med nøkkelen til større og rimelegare utbygging.
– Det har vore mange infrastrukturkrav og rekkefølgjekrav som gjer at vi har kome i den situasjonen vi er no, med manglande bygging i sentrum og at husa blir dyre. Vi kan ikkje bli sjokkerte over at vi ikkje har rimlege bustadar å tilby unge og vanskelegstilte når vi har slike krav, seier ho.
For når kommunen stiller utvida krav om utbygging og utbetring i tilknyting til bygging av nye byggefelt til dømes, så er det huskjøparane som må betale. Utbyggjarane får krava frå kommunen, men det er huskjøparen som til sjuande og sist må betale meir for tomta eller leilegheita.
Kan ikkje vente at kommunen trår til
Kommuneleiinga er på si side klare på at det viktigaste dei kan bidra med er god kvalitet og rask behandling av byggesaker og reguleringsplanar.
– Vi skulle gjerne kome med pengar til infrastruktur, men der må eg nok berre skuffe og seie at dei pengane i liten grad er der, seier rådmann Ole John Østenstad.
Han seier kommunen har hatt suksess med utbyggingsavtalar der både kommunen og utbyggar har bidrege. Og ber heller utbyggjarane om å opne lommeboka i større grad.
– Vi er i den mest sentrale delen av fylket, og det er ikkje til å kome vekk ifrå at det er store vinstar ut og går. Då syns eg det er rett og rimeleg at utbyggjarane, som haustar i neste omgang, også må vere med og betale.