Administrerande direktør i Fjord1 fylkesbaatane, Stig Kristoffersen, seier dei manglar alt få offiserar til matrosar.
- No om sommarsesongen er situasjonen kritisk. Vi har ei dagleg utfordring i å få fatt i nok kvalifisert sjøfolk for å bemanne dei ulike ferjene og båtane som vi har i operasjon, seier han.
Nokon må lide
Takka vere pensjonistar og velvillige tilsette, har Fylkesbaatane så langt klart å unngå innstillingar. Kristoffersen seier situasjonen er kritisk og at sambandet med fleire ferjer som Mannheller Fodnes er dei fyrste som kan bli råka.
- Om det er nokon som må lide, så er det der du har fleire einingar på same ferjestrekke, seier han.
- Noko må gjerast
Det er ikkje berre i Sogn og Fjordane at det er akutt mangel på kvalifisert sjøfolk. I nord har reiarlag som Hurtigruten måtte innstille ferjer i to veker i sommar. Kristoffersen veit at det i sommar kan bli uhaldbart på Lavik Oppedal eller Mannheller Fodnes om ei ferje må ligge i ro. Han meiner at noko må gjerast.
- Kapasiteten for utdanning er for liten. Det er den enden. Den andre enden vi har sett litt på er sjølvsagt at pensjonistar kunne fått høve til å stå lenger i yrket utan at dei vert straffa med avkorta pensjon.
Rømmer til Nordsjøen
Leiar i Sogn og Fjordane fiskarlag Nils Myklebust meiner at den gunstige skatteordninga til offshore-flåten, kalla nettolønnsordning, gjer at sjøfolket forsvinn i Nordsjøen der får betre betalt.