Vegen som skal utbetrast ligg mellom Smedalsosen og Borlaug. Denne delen av vegen har i dag dårleg standard og ein del skal erstattast med tunnel. Når den er på plass mellom Borlaug og Maristova, blir fire rasutsette punkt vekke. Dermed blir vegen tryggare for alle som er ute og køyrer.
For vegen som ligg der i dag er ei stor utfordring heile året. Spesielt om vinteren får store køyretøy problem som fører til at vegen blir stengd.
– Denne strekninga blir viktigare og viktigare i framtida, også som vinterveg, seier samferdsleministeren.
Når tunnelen og vegen er ferdig, er håpet at det skal bli færre stengingar og at transportkostnadene skal bli mindre. Prislappen på arbeidet mellom Smedalsosen – Borlaug er på 770 millionar kroner
Arbeidet har pågått sidan februar med bygginga av ei ny bru ved Honung og forarbeid til tunnelen.
Strekninga er ein del av prosjektet E16 over Filefjell som har ein eigen post på statsbudsjettet. Målet er ein sikrare og betre veg mellom Austlandet og Vestlandet. Totalsummen er 1760 millionar kroner og heile vegen skal vere ferdig utbygd i 2016.