I perioden mellom februar 2006 og desember 2007 fekk han utbetalt 405.749 kroner i dagpengar utan å ha krav på det. Han sendte inn meldekort til NAV sjølv om han kvar veke utførte gardsarbeid.
Aktor ville ha mannen i fengsel i åtte månader, men Sogn tingrett har dømd mannen til 90 timar samfunnsstraff.
Arbeidde 20 timar i veka
NAV fekk kjennskap til tiltalte sitt arbeid på garden ved at det vart omtalt i ei lokalavis.
Saksbehandlaren hos NAV tok då kontakt med tiltalte, og varsla at dagpengane ville bli stansa.
Mannen skal ha arbeidd rundt 20 timar på garden i veka.
Grovt bedrageri
Tiltalte har blitt pålagt å betale tilbake dagpengane, men skuldar framleis rundt 140.000 kroner.
Tiltalte skreiv på meldekortet at han ikkje hadde arbeidd i det heile. Men dette stemmer ikkje. Retten meiner difor han har fått dagpengar på uriktig grunnlag.
Han er dømd for grovt uaktsomt bedrageri.