– Føraren av den eine bilen er alvorleg skadd og er send til Førde sentralsjukehus med luftambulanse, opplyser skadestadsleiar Åge Løseth i politiet til NRK sin reporter på staden.
AMK ved Førde sentralsjukehus stadfestar klokka 14.21 at mannen er alvorleg skadd, og at føraren er send vidare til Haukeland universitetssjukehus i Bergen.
Skal ha kollidert delvis front mot front
Politiet fekk klokka 12.35 laurdag melding om ei alvorleg trafikkulukke ved Storebru mellom Naustdal og Eikefjord.
Politiet melde først at det var ein bil som hadde køyrt av vegen, og at ein person sat fastklemd. Klokka 13.02 opplyste politiet at det var to bilar involvert.
– Det er to bilar som delvis har frontkollidert. Ein person har sete fastklemd, og ein bil tok fyr etter kollisjonen, sa operasjonsleiar Wenke Hope ved Sogn og Fjordane politidistrikt til NRK.no.
Politiet fekk melding om ulukka klokka 12.35, og klokka 12.42 melde mannskap på staden tilbake at den fastklemde var frigjort. Brannvesenet som var raskt på staden fekk tidleg kontroll på branntilløpet i bilen.
Tre til sjukehus
Klokka 13.28 melder politiet at til saman tre personar er sende til sjukehus.
Den eine av dei, føraren som sat fastklemd etter ulukka, er send til sjukehuset i Førde med alvorlege skader.
I den andre bilen var det tre ungdomar. To av desse er sende til sjukehuset i Førde med ambulanse, medan den tredje personen får tilsyn ved legevakta i Florø. Alle desse er ifølgje skadestadsleiar Åge Løseth å rekne som lettare skadde.
– Det var kraftige flammar
Køyrelærar Bjørnulf Standal kom som ein av dei første til ulukkesstaden.
– Eg såg at dei tre personane i den eine bilen var komne ut, og at det var rørsle i den bilen som vart mest skadd. Det byrja ryke av den svarte bilen, og då fekk eg skrudd av tenninga og fjerna nøkkelen, og då gav røykutviklinga seg.
Også andre personar kom til, samtidig som Standal fekk ringt politiet. Så såg han at det byrja brenne i personbilen som hadde fått størst skader.
– Det var kraftige flammar som stod opp under frontruta. Men snarrådige folk fekk reve ut frontruta, og kom til med vatn som dei kasta på. Dei fekk også ut nøkkelen og kutta straumen.
Folk som kom til fekk så drege den alvorleg skadde bilføraren ut, fortel Standal.
– Det såg dramatisk ut, men han gjekk på eigne bein med støtte då han kom ut. Eg trur vi skal vere glade for at det ikkje sat nokon i nabosetet, seier Standal og viser til at bilen på den sida er svært samantrykt.
Kom over i motsett køyrefelt
Løseth seier til NRK at den eine bilen har kome over i feil køyrefelt, men det er førebels uvisst kven og korleis dette har skjedd. Det er ikkje mistanke om promillekøyring.
Ifølgje Løseth skal det ha vore vitne til hendinga. Han vil ikkje gå inn på kva desse har forklart, men seier dette lettar det vidare etterforskingsarbeidet for politiet.
Begge bilane som var involvert har fått store materielle skader.
Ulukka skjedde aust for Storebru. Det var to personbilar involvert, den eine på veg i retning Førde, og den andre på veg i retning Florø.
Vegen på staden var ei lang stund heilt stengd på staden, men klokka 13.45 blir trafikken dirigert forbi staden av politiet.