Det var like før klokka sju fredag morgon at politiet fekk melding om at ein bil låg på taket ved Geithus mellom Årdalstangen og Øvre Årdal. Bilen hadde gått over autovernet og hamna på taket nokre meter lenger nede.
– Litt over klokka ni blei ein mann funnen av ein hundeekvipasje frå Norske redningshundar. Helsepersonell blei tilkalla og dei erklærte mannen død, seier operasjonsleiar Per Rimmen hos politiet til NRK.no.
Personbilen blei oppdaga av forbipasserande like før klokka sju fredag morgon. Dei som kom til staden, fann verken førar eller eventuelle passasjerar. Det blei sett i gang eit søk med tre hundekvipasjar og to politimenn.
Operasjonsleiar Per Rimmen seier dei førebels ikkje veit om det kan ha vore fleire i bilen.
– Vi må etterforske det som har skjedd. Vi har kontakta ulukkesgruppa til Statens vegvesen. Det blir også undersøkt om det kan ha vore blitt fleire i bilen.
Ifølgje Sogn Avis blei mannen funnen på isen.
Politiet kan førebels ikkje seie noko om når bilen har hamna utfor vegen. Det er heller ingen vitne som har meldt seg. Saka blir etterforska vidare ved Årdal lensmannskontor.
– Det vi veit er at bilen har kome frå Øvre i retning Årdalstangen. Ut frå det vi veit, skjedde ulukka mellom 05.50 og 06.15, seier lensmann Magne Knudsen i Årdal.
Det var ingen vitne til ulukka og Knudsen oppmodar alle som køyrde mellom Øvre Årdal og Årdalstangen om å kontakte dei.
– Det er ynskjeleg å få oversikt over alle bevegelsar på vegen i det aktuelle tidsrommet, seier han.