– Eg følgjer med på sauene via ein app fleire gonger for dagen, seier sauebonde i Flekke i Fjaler Svante Hovland.
Han har installert GPS-sendarar eller "radiobjøller" på rundt tretti av sauene sine, og med hjelp av dei kan han vite nøyaktig kor sauene held seg til ein kvar tid.
Tidlegare i sommar var det gjennom denne appen at Hovland såg at ein sau ikkje hadde rørt på seg på fleire dagar.
– Og ganske riktig, då eg kom fram til sauen var han heilt oppeten. Kadaveret var heilt uvanleg, og eg skjøna at noko spesielt hadde skjedd.
Kort tid etter vart ein ulv oppdaga i nabobygda Guddal i Fjaler.
Sidan det har Hovland vore oppe i fjellet for å sjå til sauene sine så ofte han kan. Endå er det eit par veker til han har teke alle ned att frå fjellbeite.
– Det har vore lagt ned ein enorm ekstrainnsats
Leiar i Høyanger nordside beitelag Ove Sørestrand fortel at det er mange bønder i området som har fått ein uvanleg arbeidsam sommar etter at det vart oppdaga ein ulv. Til no er det slått fast at ulven har teke livet av fleire titals sau.
– Mange sauebønder er i fjellet kvar dag og ser til sauene sine. Det er ein heilt enorm ekstrainnsats som blir lagt ned, og ei stor arbeidsbelastning, seier Sørestrand.
Sørestrand seier at mange i Fjaler, Hyllestad og Høyanger skal sanke ned sauene sine no i midten av september, og at ein då vil få ein betre oversikt over kor mange som er drepne.
Også Rein Arne Golf i Statens naturoppsyn håpar på det. I helga var han i Guddal i Fjaler for å undersøke eit nytt kadaver som ein sauebonde mistenkte var teke av ulv.
– Eg fann ikkje noko teikn på at han var teken av rovdyr, men det var ikkje nok att av kadaveret til at eg kan utelukke det, seier Golf.
Køyrer på tvers av fylket for å undersøkje død sau
Kvar gong sauebønder i ulveområdet melder frå om at dei har funne kadaver som dei mistenkjer er drepne av ulv, tek han turen heilt frå Lærdal for å undersøkje dei døde sauene.
– Om ein sau er teken av ulv, så vil det gjerne vere teikn på at det har vore ein kamp. Vi ser etter slike spor, og spor etter anna påført skade.