Håpar på mykje edelt metall i Fredrikstad

Meisterskapen i Fredrikstad startar fredag føremiddag, med Inga Kaarstad Skaar (Førde) som første utøvar i dyst på 1500 meter.

Deretter går det slag i slag til meisterskapen er over søndag ettermiddag. Fire klubbar frå fylket er representerte.

– Fylket har mange medaljekandidatar i årets juniormeisterskap, spesielt i kastøvingane, seier Narve Heggheim, dagleg leiar i Norsk Friidrett Sogn og Fjordane.

To klare gullhåp

Gloppen er sterkast representert med heile åtte utøvarar. Blant desse kasttalenta Marte Rygg Årdal, Evald Osnes Devik, Hans Sande og Thomas Mardal, som alle er å finne på rekrutteringslandslaget i kast .

• LES OGSÅ: Kristi (15) sletta 10 år gammal hekk-rekord

– Fire-fem er det som er mest realistisk, men vi har også ein del outsiderar så det kan bli meir. Men det er meisterskap og ein veit aldri. Dei som er favorittar kan gleppe og det kan slå begge vegar for våre utøvarar, seier Heggheim.

Rygg Årdal og Osnes Devik blir trekte fram som dei største gullkandidatane frå fylket.

– Marte Rygg Årdal har prestert godt i slegge og persa førre helg. Evald Osnes Devik som har vore stabil over tid og som også representerte for juniorlandslaget i fjor. Det er vel dei vi forventar kan kjempe om gull i førsterekke, seier Heggheim.

EM-utøvar i junior-NM

I tillegg stiller den EM-klare førdianaren, Marius Vedvik , på startstreken på 5.000 meter. Vedvik representerer bergensklubben Gular.

• LES OGSÅ: EM-klare Marius (22) har forbetra tidene med nær to minuttar på to år

Sogn og Fjordane sin medaljefangst i meisterskapen plar varier frå år til år.

– Det varierer frå fire til ni-ti medaljar. I år har vi ein del unge som presterer veldig bra, men som blir relativt unge i eit junior-NM. Slik sett er det Ungdomsmeisterskapen som er deira arena. For dei er junior-NM ein bonus, men ein del av dei kan nå finalar og vere med å kjempe om medaljar, seier Heggheim.