I mange norske heimar står brannsløkkingsapparat som er utgått på dato. I verste fall kan du bli ståande med eit apparat som ikkje fungerer når det byrjar å brenne.
Feiar Reinhold Hoffmann i Førde går tilsyn i eit bustadfelt. Blant tinga han sjekkar er brannsløkkingsapparata. Altfor mange har apparat som er utgått på dato.
– Det er viktig at alle har apparat som er i orden, slik at dei kan hjelpe seg om noko skjer, er den enkle, men alvorlege bodskapen hans.
Kjem over 20 år gamle apparat
For brannsløkkingsapparat varer ikkje evig. Pulverapparat skal kontrollerast kvart femte år, og til service kvart tiande år. Skumapparat må ha service kvart femte år. Ofte er det like billig å kjøpe nye apparat som å ha dei på service.
På tilsynet i Førde konstaterer Hoffmann at skumapparatet i kjellaren er frå 2009, og dermed burde vore skifta i fjor.
At sløkkeapparat er utgått på dato med eitt år, er langt frå det verste feiarane ser. Dei verste tilfella er når dei kjem over apparat som er over 20 år gamle og ikkje har vore til kontroll eller service.
– Vi har også opplevd at folk kjem berande med nye apparat rett frå butikken når vi er på tilsyn, seier Hoffmann.
Huseigarar veit for lite
Hos Norsk Brannvernforening og IF Skadeforsikring stadfestar dei inntrykket om at altfor mange har brannsløkkingsapparat som er utgått på dato.
Ei undersøking IF gjorde i 2010 viste at dei fleste ikkje kjenner reglane for kontroll og service, og at mange heller ikkje anar kor gamle sløkkeapparata er.
Informasjonsdirektør i IF, Jon Berge, trur ikkje folk har blitt flinkare.
– Alle som blir råka av brann seier dei ikkje trudde det skulle skje dei. Folk må slutte å tenkje slik, det er farleg. Dette med brannsløkkingsapparat er blodig alvor. Blir du ståande i ein situasjon der sløkkeapparatet ikkje fungerer, kan det blir alvorleg.
– Ta det på alvor
Også administrerande direktør Dagfinn Kalheim i Norsk Brannvernforening skulle ønskje folk tok dette meir alvorleg.
– Dei fleste brannar startar i det små, og kan handterast med eit fungerande sløkkeapparat.
– Men om apparatet sviktar har ein lite å hjelpe seg med, og då kan det utvikle seg til ein større brann, noko som kan bli meir enn dramatisk, seier han.
– Dei gjer heimane tryggare
På tilsynet i Førde konstaterer feiaren at begge skumapparata er for gamle.
Huseigar Linda Solsvik er oppteken av å vere sikra best mogleg, og set pris på besøket.
– Slik kan dei oppdage om folk har feil apparat, om dei er utgått på dato og at røykvarslarane er i orden. Dei er med å gjere heimane våre tryggare, seier ho.