– Vi har opplevd den største tragedien i nyare tid. Det er meiningslaust. Vi føler medkjensle og fortviling, sa prost i Nordfjord, Rolf Schanke Eikum, til eit prega publikum.
Kriseteam på festivalen
Fleire tusen festivalgjengarar hadde samla seg framfor hovudscena til minnemarkeringa i forkant av Bjørn Eidsvåg sin konsert laurdag ettermiddag.
– Vi vil stå saman og markere solidaritet. Nokon av dykk kan få melding om at nokon av dykkar vener eller kjende er blant dei råka. Treng de snakke om de, har vi kriseteam. Ta kontakt med ei vakt. Det vil bli opa kyrkje, sa prosten som hadde følgje av festivalsjef Arnt Ivar Naustdal på scenen.
(Artikkelen held fram under biletet.)
Spelte på Utøya
Også fredag kveld, før Bergens-bandet Datarock entra scenen, markerte festivalen tragedien på Austlandet med eitt minutts stille. Datarock spelte torsdag kveld på nettopp utøya.
– Vi vil vise at vi står saman mot alle vonde krefter, og vise medkjensle og deltaking med alle dei som er råka, med eit minutt stille, sa Rolf Schanke Eikum.
(Artikkelen held fram under biletet.)
Verdig Eidsvåg-konsert
Etter stilla entra ein alvorstyngd Bjørn Eidsvåg scenen som ei musikalsk verdig markering av tragedien.
Han starta konserten med songen «Evig Hvile» og den rørande førstestrofa «Ingenting blir noen gang som før. Og før kommer aldri mer igjen».
Eidsvåg avslutta konserten med «Eg ser».
– Det er ikkje vits i å seie noko anna enn at denne er dedisert til dei som vart råka av gårsdagens hendingar, sa Eidsvåg til rørt publikum på Nordfjordeid.