Det meiner kaptein for Førde sine volleyballherrar, Mathias Loftesnes. Førre helg enda dei på tredje plass under ei eliteturnering i Rogaland. Kommande helg ventar ei ny turnering i Bergen for dei regjerande cup- og seriemeistrane.
Om knappe to veker er det serieopning med bortekampar mot Randaberg og TVN.
– Vi var ikkje nøgde med resultatet i helga, men vi fokuserte heller ikkje så mykje på resultata. Det blir viktigast når serien startar. Akkurat no må vi utvikle spelet vårt, seier Loftesnes.
Halvt lag må spelast inn
For det blir endringar i stallen også i år. Frå TVN har Førde henta Oskar Raftevold, Martin Olimstad og Jonas Hjelle van Weert. I tillegg blir libero Øystein Bergum ute med skade i lengre tid.
Kantspelar Lars Fredrik Tvinde skal inn som oppleggar. Det betyr at også både ein libero og kantspelar må spelast inn til sesongstart.
– Det er eit halvt lag som må spelast saman. Men etter ei god oppkøyring med mykje trening, så byrjar vi å nærme oss. No er vi spente og klare for sesongen, seier Loftesnes.
Hektisk november
Førde får spesielt ein tøff haust når dei for første gang går inn i ein sesong som regjerande serie- og cupmeister. Dette vil dei forsvare. I tillegg ynskjer dei å hevde seg i Nordisk Liga, ei turnering dei vann i 2011. Om ikkje det er nok, skal laget ut i europacupspel.
- Les også: Snappa seriemeisterskapen frå erkerivalen
- Les også: Endeleg vart Mathias cupmeister
Det resulterer i ein hektisk november månad, med seriekamp heime mot Randaberg 5. november, heime- og bortekamp mot portugisiske Fonte Bastardo Azores i europacupen innan 24. november. Og innleiande runde i Nordisk Liga veka etter.
– Det blir nok kampar og kan fort bli ein avgjerande månad for resten av sesongen. Det er viktig å vere i form i starten, seier Loftesnes.
– Laga vil slå oss
Som fjorårets dobbeltmeister kan fallhøgda bli stor, men Loftesnes både trur og håpar spelarane leverer varene. Både Viking, tidlegare Nyborg, og Randaberg er klare til å utfordre.
– Eg trur vi har godt av det. Det blir tøffare og vi må vere på hogget frå starten av. Vi bli favorittar og det gir oss ekstra press. Samstundes må vi sikte på å gjere det like bra i år, og det trur eg vi skal klare, seier han.
– Kva blir den største utfordringa?
– Laga vil slå oss endå meir i år. I tillegg har vi eit hardt program med veldig mange kampar så vi må halde fokus. Det blir heller ikkje berre berre å halde oss skadefrie, seier han.