Denne helga kan vi få to vinnarar av Spellemannsprisen, ein vinnar av NRK P3 sin Urørtfinale og ein utøvar vidare til finalen i Grand Prix.
Urørt på fredag
Den lokalmusikalske helga startar alt fredag kveld. Då arrangerer NRK P3 finalen i sin talentkonkurranse Urørt. Pony The Pirate er ei av ti grupper som kan bli Årets Urørt. I gruppa finn vi Kurt Andrè Aase frå Bygstad i Gaular og Camilla Sæle Merkesvik frå Ortnevik. Vi følgjer sendinga, og vil gi deg lenkje til NRK P3 si sending på nett-tv her på fredag.
Spellemannspris på laurdag
På laurdag kan det bli storfest og to Spellemannsprisar til band frå fylket. Då er nemleg Steinar Engelbrektson band nominert i kategorien for danseorkester, og Good time Charlie i kategorien for blues. NRK Sogn og Fjordane følgjer utdelinga, og vil gi deg resultat og kommentarar laurdag kveld.
Surferosa skal rocke Grand Prix
Den første delfinalen i Melodi Grand Prix vert arrangert i Kongsvinger på laurdag. Der skal Mariann Thomassen og Surferosa framføre sin melodi U Look Good. Vi følger delfinalen og skal oppdatere deg på resultatet utover laurdagskvelden. Neste laurdag er det Tone Damli Aaberge som deltek i delfinalen i Grand Prix i Bodø.