Med overlegne 290 poeng sette Åshild Mundal rekord og vann den aller siste Fylkestoppen frå NRK Sogn og Fjordane. På grunn av endringar i programplanen til NRKP1 går hitlista frå fylket ut i si noverande form.
Tone og Thea kom inn
To av utfordrarane tok ein sterk og delt andreplass på lista med 271 poeng. Thea Hjelmeland og Tone Damli er begge aktuelle med ny musikk denne våren, og lyttarane sette utan tvil pris på det dei presenterer. Også Håvard Lothe Band klarte å kome seg innom dei fire øverste på Fylkestoppen.
Siste fylkestoppen
Himora, Green Granadas og House of Clowns gjekk ut av lista. Men denne månaden er det altså ingen artistar som går vidare, sidan dette var den aller siste fylkestoppen.
- Det er mogleg at fylkeslista kjem attende i ei anna form seinare. Men lokalmusikk skal det ikkje bli mindre av i NRK Sogn og Fjordane. Lutt held fram i den nye sendinga med fast sendetida annankvar fredag, fortel Luttprogramleiar Stein Jarle Aase.