Av 146 16- og 17-åringar, deltok 120 av ungdomane i kommunen ved årets kommunestyreval.
Det gir ein oppslutnad på 82,2 prosent, og er skyhøgt over normalen for førstegongsveljarar.
- LES OGSÅ: 16-åringar strøymde til valurnene
– Det er alltid flott å toppe slike statistikkar. Det var imponerande, men vi fekk tilbakemelding heilt frå starten om at dette var noko ungdomane ville vere med på, seier ein stolt avtroppande ordførar, Torodd Urnes (KrF).
Best i klassen
Urnes tok initiativ til å søkje om å få vere då kommunaldepartementet opna for prøveordninga.
Responsen frå ungdomen var overveldande. Det var ingen andre kommunar i prøveordninga som kunne måle seg med oppslutnaden i Luster. Urnes er ikkje overraska.
(Artikkelen held fram under oversikta)
– Vi har hatt informasjon til begge kulla i 10. klassen, engasjerte ungdommens kommunestyre og fekk ungdomane til å spreie bodskapen på sosiale medium som Facebook. Like før valet hadde vi informasjonsmøte for alle 16 til 19-åringar, seier Urnes.
Betre enn dei vaksne
Den totale valdeltakinga i Luster var også høg med 73,09 prosent, mot 70,14 ved valet i 2007. Ungdomane gjekk dermed dei vaksne ein god gange i oppslutnad.
Ved dei tre førre vala har deltakinga blant førstegongsveljarane i snitt vore 33 prosent.
– Skulevalet er jo berre ein gimmick, men dette telde jo. Røystene deira talde på lik linje med dei vaksne si røyst, seier han og meiner tala viser at ungdomane let seg engasjere av politikk.
Studerte programma
– Eg trur det gav inspirasjon. Det vil alltid vere nokon som trekkjer på skuldrene og tenkjer at valet «ikkje gjeld oss». Det som var imponerande var at dei sette seg inn i programma og fann skilnader mellom program. Eg trur kanskje ungdomen var dei som las programma best, held Urnes fram.
Han trur også at responsen har overtydd skeptikarane blant kommunepolitikarane, om at dette er noko som bør innførast fast.
– Det var kanskje ikkje alle sitjande politikarane som var begeistra, men eg trur nok dei har fått eit anna syn på det no som dei ser kor ungdomane slutta opp, seier han.