Krasja med sommardekk på vinterføre

Sunnfjordingen hadde latt kameraten skifte dekk på bilen. På glatt føre frontkolliderte han med ein annan bil i Fjærland. No er han dømd for ulukka.

Kollisjon i Fjærland

KOLLISJON: Sunnfjordingen kontrollerte ikkje sjølv at kompisen hadde sett vinterdekka på bilen hans. Etter ulukka fann politiet to sommardekk og to vinterdekk som ikkje stetta krava.

Foto: Kjell Arvid Stølen / NRK
Oddleif Løseth
Journalist

Mannen i 30-åra kom sjølv uskadd frå ulukka i midten av desember i fjor, medan føraren av den møtande bilen fekk brot i ryggen og vart liggande fire dagar på sjukehus.

No er sunnfjordingen dømd til fengsel i 15 dagar, og 8 000 kroner i bot, etter ulukka.

Sommardekk og slitne vinterdekk

Mannen erkjende straffskuld då saka nyleg var oppe i Sogn tingrett.

Ulukka skjedde då han var på veg for å besøke ein sjuk kamerat, men i Fjærland mista han kontroll over køyretøyet på det glatte føret , og krasja med ein møtande bil.

Under etterforskinga fann politiet to piggfrie vinterdekk og to sommardekk på bilen til sunnfjordingen. Vinterdekka hadde spordjupne på 1,6 millimeter. Kravet er tre millimeter.

Kom heim frå ferie

Sunnfjordingen forklara at ein kamerat skulle setje på vinterdekka medan han sjølv var vekke på ein lengre ferie. Då han kom heim fekk han lovnad om at dette var gjort, men kontrollerte ikkje sjølv om vinterdekka var på før han la ut på vinterføret.

– Det sentrale er derimot at det var hans ansvar å sjå til at han køyrde med dekk som sikra tilstrekkeleg veggrep, skriv tingrettsdommar Kristine Geirsdatter Celius.

Retten meinte aktløysa var så graverande at den kvalifiserte til ei kortare fengselsstraff. Straffa slepp mannen å sone, så lenge han ikkje gjer nye lovbrot dei neste to åra. Han vart også frådømt retten til førarkort i tre månader, men denne perioden er allereie sona.

Øya Bremangerlandet vil vere utan veg til fastlandet fram til neste veke.
For han som var sekundar frå å bli treft av steinblokkene, var det ei skremmande oppleving.
Over 3000 asylsøkjarar har forsvunne siste året.
  
Heile villreinstammen på Nordfjella, nær 2000 dyr, bør utryddast snarast råd. Det meiner forskarar etter at det i fjor blei påvist skrantesjuke. 
I dag møttes forskarar, politikararar og forvaltninga, for å diskutere den vidare kampen mot smitta.