Vuspelen, som det vert forkorta til, er eit av dei aller største stemna for friidrettstalent i Skandinavia.
Kristiane Sekkingstad Terum, Aurland IL sprang inn til ny kretsaldersrekord i klasse 13 år, då ho fredag tok ein flott tredjeplass på 600 meter.
Tida blei sterke 1.38.34, berre tre tidelar bak sølvmedaljen og personleg rekord med over fire sekundar.
– Løpet var av det dramatiske slaget, då Kristiane trakka over i første sving og seinare var involvert i knuffing, men klarte likevel å kjempe seg fram til bronsemedalje på oppløpssida, fortel far Olav Terum.
Han opplyser at ho står truleg over 80 m som er på programmet laurdag, men stiller på 200 m søndag om ankelen er bra. Denne distansen vann Kristiane i 2012.
Storebroren til Kristiane, Sander Sekkingstad Terum, tok sølvmedalje på 3000 m hinder i seniorklassen i Verdensungdomsspelen fredag.
Berre seks løparar stilte til start grunna kollisjon med 5000 m same kveld, men Sander gjorde eit taktisk godt løp og kom i mål på 9.39.14 kring 8 sekundar bak vinnaren og to sekundar føre nummer tre.
Kirsti Strømmen Kjerpeset frå Florø tok sigeren i sin aldersklasse i 80 meter hekk med den sterke tida 11.46, medan Øyvind Strømme Kjerpeset slo kraftig til og sette ny norsk rekord på 400 meter hekk under stemnet med tida 49.95.