Også søndag vart det leita i Årdalsvatnet med miniubåt - utan resultat. Søket held fram i dag.
Fredag var siste dag politiet og det offentlege stod for leiteaksjonen etter 17 år gamle Charlotte Moene.
- Laurdag og søndag har det vore søkt med miniubåt i Årdalsvatnet, men vi har ikkje funne noko, seier Helge Rørvik, som er koordinator for den private leiteaksjonen.
Aksjonen vert finansiert av pengane handballvenane tok initiativ til å samle inn. Til saman har det vore 800 000 kroner tilgjengeleg til leiteaksjonen. No brukast mykje av dei pengane på å finansiere bruk av miniubåt. Det kostar 60 000 kroner per dag å bruke den. Tysdag vert det også sett inn hundar i søket etter Moene.
- Vi er lova at det skal kome to hundar måndag kveld. Dei vil vi bruke saman med miniubåten, seier Rørvik.
Ubåten vil berre vere i Årdal til og med onsdag. Då må den vidare på andre oppdrag. Hundane vil vere i Årdal tysdag og onsdag.