Like etter går bombealarmen på Old Trafford

– Vi hadde akkurat sett oss ned då vi ein halvtime før kampen fekk beskjed på høgtalaranlegget om «Code Red», fortel Tom Christan Wergeland til NRK.

Sogndølen og kameraten Geir Kåre Resaland hadde tatt med kvar sin son på førstereis til Manchester United si storstove Old Trafford. Men like før årets siste heimekamp, mot Bournemouth, skulle starte klokka 16.45, gjekk bombealarmen.

• Les også: Old Trafford evakuert – kampen avlyst

Vart sitjande

– Vi såg at tribunen vart tømt for folk på West og North End. Det kom mange beskjedar om at vi måtte bli sitjande på South og East End. Halve tribunen vart evakuert, mens vi blei sitjande. Vi venta ein halvtime-times tid. Då gjekk rykta på internett om at kampen var avlyst grunna bombetrussel, fortel Wergeland.

Ein mistenkeleg pakke på North Stand fekk alarmen til å gå. Etter kvart vart det klart at kampen ikkje vart utsett, men avlyst. Mens politiet og bombehundar tok over tribunen, vart publikum evakuerte.

– Det er tragisk, men det er jo enda godt at det ikkje har gått av noko bombe, seier Wergeland på telefon frå utsida av stadion.

Skuffa smågutar

Han fortel at dei har hatt ei strålande helg med både godt vêr og opplevingar i kø for gutane på sju og 10 år. Likevel vart det tungt å fordøye at kampen gjekk fløyten.

– Dei er leie seg og gret. Men vi har hatt ei strålande opplading til kampen med omvising på Old Trafford, møtt dei tidlegare spelarane Lee Martin og David May, og fått signerte trøyer. Så vi har fått ei oppleving for livet, men prikken over i-en mangla.

Klokka 17.39 informerte politet om at dei har gjennomført ei kontrollert sprenging av pakken. Wergeland hadde i det lengste håpa at kampen kunne blitt spelt seinare i kveld.

– Det kjedelegaste var at det ikkje blei kamp, at dei ikkje søkte gjennom tribunen og spelt ein time seinare eller noko. I staden sende dei 80.000 heim. Det er mange som er lei seg.

Er tilbydd nye billettar

– Kva seier engelskmennene?

– Dei er skuffa dei og. Vi har faktisk fått tilbod frå fleire om kampbillettar til kampen, når den måtte bli spelt. I rein sympati. Både frå ein engelskmann og nokre danskar, så det er jo flott.

– Kva gjer de no?

– Eg veit ikkje. Dette var julepresangen til gutane våre. Det er ein stor nedtur at kampen vart avlyst, men vi har hatt ei strålande helg elles. Vi får finne på noko alternativt. Vi går gatelangs her saman med store folkemengder. Vi skal ikkje heim før i måndag kveld, så vi har sjanse til å finne på noko, seier Tom Christan Wergeland i Manchester.