Leikanger kan få 25 nye statlege arbeidsplassar

– Det er ei viktig sak for både Leikanger og Sogn. Dette er kompetansearbeidsplassar, og ei utvikling av det miljøet vi har. Det er mange arbeidsplassar, men også spennande arbeidsplassar, seier Leikanger-ordførar Olav Lunden.

Lunden mobiliserer for at kommunen skal få om lag 25 nye statlege arbeidsplassar. Regjeringa vurderer nemleg kvar dei skal plassera ei ny statleg valeining som skal få ansvaret for å gjennomføra vala i Norge.

• LES OGSÅ: Stor mangel på bustader i Leikanger - ber kommunen rydde opp
• LES OGSÅ: Stadig fleire jobbar i vegvesenet

Kjempar mot to andre

Tre plassar blir greidde ut av eit privat konsulentfirma – Brønnøysyndregistra i Brønnøysund, Direktoratet for samfunnstryggleik og beredskap i Tønsberg og Direktoratet for forvaltning og IKT – DIFI – på Leikanger.

Erfaringa frå liknande statlege etableringar på Syrstrond er god, seier Lunden.

– Det var nok ein viss skepsis då vi starta på Difi-utviklinga, men det gjekk greitt å skaffe fagfolk. Det var greitt å få folk til å etablere seg, og det er stabile miljø, seier Lunden.

• LES OGSÅ: Likar ikkje Oslo-dominans i Difi
• LES OGSÅ: Vil ikkje tvinge direktør til Sogn

Lite å hente på administrasjon

I dag er valavviklinga direkte underlagt Kommunal- og regionaldepartementet. Norge har fått internasjonal kritikk for ei for tett kopling til det politisk maktapparatet.

Regjeringa ønskjer difor å laga ei meir uavhengig valeining som skal samlokaliserast med eit anna statleg forvaltningsorgan, for å spara administrasjonsutgifter og trekkja vekslar på relevante fagmiljø.

– Vi har lite administrative funksjonar på Leikanger, så det er lite å hente på ein veldig tett samlokalisering, seier konstituert direktør i Difi, Vivi Lassen.

• LES OGSÅ: Sjå kva kommunar som har fått fleire og færre arbeidsplassar
• LES OGSÅ: – Det vil vere lite fornuftig å leggje ny direktørstilling til Leikanger

Navarsete vil ikkje kommentere

– Men å utvikle eit godt fagleg miljø på Leikanger, med andre statlege verksemder her på Leikanger, ser vi positivt på. Dei har jo eit utviklingsmiljø, og vi driftar jo ulike løysingar, så det er klart det er erfaringar her som kan vere nyttig for ei valeining å trekkje vekslar på, seier Lassen.

Kommunal- og regionalminister Liv Signe Navarsete ønskjer ikkje å kommentera saka, fordi ho til handsaming i departement.

Spørsmålet er om plasseringa av valeininga blir avgjort før den raudgrøne regjeringa går av i oktober. Sogn regionråd har bede om snarlege møte med både Navarsete og administrasjonsminister Rigmor Aasrud for å leggja fram argumenta for Leikanger.

– Eg reknar med at det må kunne gå an å få ei rask avklaring. Men når og korleis det er mogleg, veit eg ikkje, seier Lunden.