– Eg synest det er trasig for vår del, seier lastebilsjåfør Leif Kallekleiv.
Norled si banebrytande og miljøvennlege ferje Ampere som går på strekninga Lavik – Oppedal, slit med stikkontakten. Ferja er batteridriven og må ladast. Men den eine ladestasjonen i Lavik fungerer ikkje som den skal.
– For oss som lever av å køyre på vegen handlar alt om køyre- og kviletida. Viss vi blir ståande taper vi køyretid., seier Kallekleiv.
- Les også:
Problem med å halde ruta
Det er vanskar med ladestasjonen i Lavik som gjer at ferja «Ampere» må stå over kvar tredje tur. Lastebilsjåførane har fått merke følgjene.
– Sist eg reiste vart vi ståande på ferja, for dei fekk ikkje lada ferja godt nok. Då kom eg ikkje så langt eg skulle den dagen.
- Les også:
Då Norled tok over Lavik-Oppedal etter Fjord1 ved nyttår, var kravet frå Vegvesenet tre ferjer, den eine elektrisk. Så langt har el-ferja hatt store problem med å halde ruta.
– Det får litt følgjer, for vi skal stort sett vidare langs kysten, seier lastebilsjåfør Jarle Naustdal.
Mannskapet har ikkje lov til å snakke på tv, men fortel at dei ei lei av å få kjeft frå bilistar.
– Vi har time i Førde klokka 13, men det er heilt umogeleg å passe tidene, seier drosjesjåfør Bente Halsvik.
Trafikantane håpar at Norled snart er kvitt barnesjukdommane, slik at dei kan stole på at ferja går til den tida den skal.
– Selskapet burde kanskje ha prøvd ut teknologien på eit mindre viktig samband enn her på E39. Kanskje dei kunne prøvd det ut på Osterøy-ferja, tullar lastebilsjåfør Leiv Kallekleiv.
- Les også:
Kan svi på pungen
På grunn av forsinkelsar både med bygging av ferja og kaia, har ikkje Norled fått testa teknologien skikkeleg før den var i trafikk.
– Dette er nybrotsarbeid. Det er ny teknologi for oss og dei som jobbar om bord på ferja. Læreprosessen er godt i gang, men vi er ikkje i mål enno, seier Norled-sjef Inge André Utåker.
Problemet for selskapet er å få nok straum inn på ferja fort nok, slik at dei kan halde rutetida. Selskapet har fått frist til 1. april om å ha tre ferjer i timen.
– Vi skal få det til. Dersom vi ikkje lukkast, risikerer vi trekk i godtgjeringa frå Statens vegvesen. Det vil sjølvsagt vere uheldig, men det skal vi kunne handtere, seier Utåker.