Ferdig i Tyskland - no trenar Hovland med Sogndal

– Alle har sjølvsagt lyst til å vere lengst mogleg i utlandet, men eg er open for alt. Eg får sjå kva som blir det beste alternativet for meg og familien til slutt, seier Hovland til NRK.no.

Med knappe to veker att til VM-kvalifiseringskampen mot Tsjekkia på Ullevaal, står ein av dei faste stopparane på landslaget utan klubb. Tre år med opp- og nedturar på nest øvste nivå i Tyskland enda med at veimingen forlèt Nürnberg utan å vite kvar karrieren går vidare.

– Er det noko interesse rundt deg?

– Det har vore noko interesse, ja, men det får Jim Solbakken ta seg av. Eg tek meg litt fri no, så jobbar han med det.

Hovland sin agent, Jim Solbakken, har ikkje svart på NRK sine førespurnader i dag.

Var benkeslitar

Etter to år i Molde klarte han ikkje å takke nei til proffspel i Tyskland. Sjølv med mykje benkesliting nektar Hovland for at han angrar.

– Ikkje i det heile teke. Det er ei oppleving å kome seg ut og spele fotball i eit anna land.

• Les også: Hovland vart spådd å bli ein bauta i Tyskland
• Les også: Even Hovland (25) solgt til Nürnberg

Den tidlegare Sogndal-spelaren etablerte seg raskt på laget, men etter at laget fekk ein oppsving har Hovland sete mykje på benken.

– Det starta med mykje speletid, men i fjor hamna eg på benken og laget gjorde det bra. Då er det naturleg at ein ikkje får sjansen, når resten av laget spelar godt. I år har ikkje laget prestert godt nok, men eg har likevel ikkje fått sjansen. Då blir det litt vanskeleg, men slik er fotballen.

• Les også: Hovland om Riise-kritikken: – Må få mene hva han vil
• Les også: Sjekk denne oppturen for Even Hovland

Ventar på uttaket til VM-kvalik

Trass benkeslitinga har Hovland meir eller mindre hatt fast plass på landslaget siste åra. Han etablerte seg på laget under Per-Mathias Høgmo, og har også fått tillit etter at Lars Lagerbäck tok over.

10. juni møter Norge Tsjekkia til VM-kvalifiseringskamp. Tre dagar seinare spelar Norge privatlandskamp mot Sverige. Heime i Norge har Hovland denne veka trena med Sogndal.

– Eg må halde fotballforma ved like, dersom eg blir teken ut. Eg kan ikkje legge meg på latsida.

• Les også: Hovland om ny landslagssjef: – Eit spennande val
• Les også: Landslagspause gjorde Hovland til Norges bauta
• Les også: Har blitt benkeslitar medan laget er i medvind: – Dette må eg berre takle

Veit ikkje kvar han endar

Sogndal slit med mange skadde spelarar, men Hovland vil ikkje vere konkret på spørsmål om han har høyrt noko frå klubben.

– Vi har ikkje prata noko om det, og det er ikkje noko eg har tenkt på. Eg får ta det når det kjem noko konkret frå nokon.

– Er det freistande å kome tilbake til Norge?

– Det kjem an på kva tilbod eg får. Eg må vere tolmodig og sjå kva moglegheiter som byr seg.

• Les også: Snuoperasjonen byrja med Hovland frå start