Unni og Arne Einar er med å skape store verdiar

I desember i fjor vart 42 kyr og om lag 90 ungdyr flytta inn i det nye store lausdriftsfjøset til Arne Einar Reed på Breim.

Prislappen var på 12 millionar kroner og Reed er avhengig av låge renter og gode prisar på mjølk og kjøt for å få det heile til å gå i hop.

– I tillegg er eg avhengig av at overføringssystemet blir ført vidare, i den forstand at ikkje ein større del av den samla statsstøtta går til bøndene på Austlandet, seier Reed.

Han er ein av vel 5000 personar i Sogn og Fjordane som jobbar innan jordbruk, skogbruk og foredlingsindustri knytt til desse næringane. Tal frå Norsk institutt for bioøkonomi viser at dei skapar store verdiar for fjordfylket – meir nøyaktig 1,7 milliardar kroner årleg.

Fryktar Austlandet tek over

Einar Arne Reed er imponert over at næringa han jobbar i skaper så store verdiar, men fryktar samstundes at meir og meir av verdiskapinga vil kome på Austlandet.

Han meiner Austlandet må ta seg av kornproduksjonen som i dag, og at Vestlandet får halde oppe naudsynte overføringar til å kunne drive lønsam mjølk- og kjøtproduksjon.

885 millionar frå jordbruket

Det er Norsk institutt for bioøkonomi som presenterer det samla faktagrunnlaget for verdiskaping i landbruket og skogbruket i fylket. Tala er henta frå 2013, og seniorforskar Heidi Knutsen fortel om stor verdiskaping.

– Verdiskapinga i jordbruket er på 885 millionar, skogbruket 130 millionar og foredlingsindustrien basert på råvarer frå landbruket i fylket er på 600 millionar, seier ho.

– Samla sett er den samla verdiskapinga på om lag 1,7 milliardar. Dette er ein stor sum som viser at landbruket og skogbruket er viktig for Sogn og Fjordane.

• LES OGSÅ: Her vil ingen drive landbruk lenger, og jorda ligg brakk
• LES OGSÅ: Dette meiner han er løysinga for landbruket

Høgast verdiskaping i Gloppen

Det er Gloppen kommune som har høgast verdiskaping i jordbruket fylket, med 107 millionar kroner.

På andreplass følgjer Stryn med 90 millionar, Luster 72 millionar, Sogndal 60 millionar og Jølster 58 millionar. Mjølkeprodusentane står for nær 60 prosent av verdiskapinga i jordbruket.

Målt per innbyggjar er det Hornindal som har den høgaste verdiskapinga, med nær 20.000 kroner per innbyggjar. Gloppen, Jølster, Vik og Gaular kjem på plassane bak.

Over 5000 årsverk

I 2013 var 2800 årsverk i jordbruket i fylket. Sysselsettinga i skogbruket var på 106 årsverk.

Dersom ein også tek med foredlingsindustrien og andre ringverknader, blir det i rapporten slått fast at det samla er i overkant av 5000 årsverk knytt til jordbruks- og skogbruksnæringa. Dette utgjer ni prosent av alle sysselsette i fylket.