Geir Eithun har så vidt kome i gang med treningane etter nokre dramatiske dagar tidlegare i haust.
Smerter i brystet viste seg å vere lungekollaps og 37-åringen frå Førde fekk to døgn på Haukeland sjukehus.
– Eg er frisk, men har ikkje fått trena meir enn eitt par veker. Eg er langt ifrå i toppform, men kan spele i ulike posisjonar og er klar dersom behovet skulle dukke opp, seier han.
Møter gamleklubben
Kveldens semifinale mellom Førde og Viking (tidlegare Nyborg) har mange aspekt rundt. Klubbane er mangeårige erkerivalar, bergensklubben sende i haust Førde ut av Nordic League, medan Førde snappa seriemeisterskapen rett framfor nasen på bergensarane førre sesong.
Eithun er spent før møtet med klubben han vart cupmeister med i januar.
– Eg trur det blir ein tøff kamp som kan slå begge vegar. Førde har vore, og er, uføreseielege. I periodar der det gjerne ikkje går så bra, så klarer ein likevel å hente fram det vesle ekstra i cupen, seier han.
Revansjelystne
Då dei to laga møttest i den innleiande runden av Nordic League, var det stor skilnad på laga. Bergensarane hadde god kontroll og vann kampen 3–1.
– Det overraskar meg om kampen i kveld blir lik den i Nordic League, seier Eithun.
– I den kampen var ikkje vi gode i det heile, og Viking er gode på heimebane, seier Førde-kaptein Mathias Loftesnes og kjenner seg trygg på at bergensarane vil få eit heilt anna møte med sunnfjordlaget i kveld.
Ikkje umogleg
Kampen i kveld er den første av to semifinalar. Returmøtet går i Bergen neste helg.
– Vi hadde ei god oppleving under cupfinalen i fjor, og den vil vi veldig gjerne oppleve igjen, held Loftesnes fram og meiner det ikkje er umogleg å tukte Viking.
– I Nordic slo vi dei ganske klart i eitt sett. Dersom vi får eit godt servepress, så har ikkje dei mottak og får store vanskar.
– Har utfordringar
– Vi har tapt litt no, og då er det vanskeleg å få ei kjempegod kjensle. Men vi veit kva vi har fått til, vi veit kva vi får til på trening og vi veit kva potensial vi har. Vi er sugne på å slå tilbake, seier Loftesnes.
Førde må klare seg utan libero Øystein Bergum som fekk eit lite tilbakefall på kneskaden etter europacupoppgjera.
– Også vi har utfordringar før kampen i kveld, men det er ikkje snakk om å spare spelarar til vi byrjar europacupen på onsdag. Cupen er viktig for oss, avsluttar Eithun.