Teamet frå verdas største skifilmselskap vart imponerte over opphaldet deira då dei nyleg gjorde opptak til ny film.
– Alle som kom hit var utruleg imponerte av kor vakkert det er og kor mykje skikøyring ein kan gjere i urørt natur, fortel Oscar Almgren frå Uteguiden As i Stryn.
To veker
Almgren var med som guide på det 12-dagars lange opphaldet til fillmcrewet frå amerikanske Warren Miller Entertainment.
I løpet av to knappe veker har dei filma i Sogn, Nordfjord og på Sunnmøre, skriv Sunnmørsposten. Dei har blant anna vore på topptur og testa skianlegg i Hjørundfjorden og Fjærland, og avslutta denne helga med off piste-køyring i Stryn.
(Artikkelen held fram under biletet)
NYT UTSIKTA: Filmmakarane på topptur i finevêr.
Foto: Oscar Almgren
Skapar blest
Den lokalkjende guiden er trygg på at endå fleire vil bli interesserte i området når filmen vert lansert på marknaden i september. Han spår langt fleire besøkjande til vinteren.
– Det er fleire som kjem allereie no. Berre om nokre veker kjem det nokre andre store filmselskap hit til Nordfjord og Hjørundfjorden, seier Almgren.
- LES OGSÅ:
- LES OGSÅ:
På sikt trur Almgren at skifilmen kan vere med på å gjere Nordfjord som ein populær vinterdestinasjon på storleik med Sunnmøre og Romsdalen.
– Nordfjord har nok hamna litt i klem mellom dei to store naturområda. Men eg ser at interessa for Nordfjord veks og veks, og eg trur den vil bli like stor som for Romsdalen og Sunnmøre.