Meieriet i Vik i Sogn lagar årets tredje beste gamalost. Det fekk dei vite under Landsmejeriudstilling i Herning i Danmark.
Men meieriet på Byrkjelo fekk også medalje. Dei fekk bronse for beste geitost.
TINE tok elleve medaljar
Per Henning Liljedahl
Dermed tok TINE sine anlegg på Vestlandet eit godt grep i medaljefatet. Heile elleve medaljar vart tildelt for produkt som er laga på TINE sine anlegg i Vest.
– Bak dette ligg det stor innsats, og høg kvalitet i alle ledd. Samstundes er dette ei stadfesting av at TINE sine produkt hevdar seg godt i konkurranse med meieriprodukt frå våre naboland, seier driftsleiar i Vik, Per Henning Liljedahl.
150 fagdommarar i juryen
Meieriprodukt frå Norge, Danmark, Færøyene, Sverige, Finland og Island har deltatt i årets Scandinavian Dairy Contest/Landsmejeriudstilling i Herning i Danmark. Her har produkta blitt vurdert av til saman 150 fagdommarar.
Landsmejeriudstillingen i Herning er verdas største meieriutstilling.
Formålet med utstillinga er å fremja den faglege stoltheten gjennom bedømmelse og premiering av produkt. Utstilling skal også verke som inspirasjon til kvalitetsforbetring og produktutvikling.