Oppdatert tysdag kl.12.33: Det var 57 år gamle Valborg Heløy frå Skjolden som omkom i ulukka i Lærdalstunnelen.
– Vi fekk beskjed om at personen var omkommen kort tid etter vi kom til staden, seier operasjonsleiar ved politiet sin operasjonssentral, Per Rimmen.
Totalt fire køyretøy var involvert i ulukka.
– Det var front mot front mellom ein personbil og ein buss. Personbilen trefte fjellveggen etter kollisjonen. Ulukka skjedde mellom to til tre kilometer inne i tunnelen frå Lærdal, seier Oddbjørn Aune, som er vaktleiar ved Alarmsentralen.
Det var føraren av personbilen som omkom i ulukka. To bilar som kom bak personbilen køyrde i kvarandre under oppbremsing.
– Det var store materielle skader på bilen som køyrde i fjellveggen. Det måtte bilberging til for å få bussen ut av tunnelen, seier Rimmen.
I bussen var det 22 personar, medan det var ein person i bilen som kolliderte med fjellveggen. I dei to andre bilane var det ein person i kvar.
Ein svensk turistbuss køyrde inn tunnelen etter ulukka for å hente ut fleire personar.
– Det er forferdeleg
Sambuarparet Astrid Juvik og Sjur Herheim var blant dei som skulle gjennom ulukkestunnelen.
– Det er forferdeleg. I ein så lang tunnel kan mykje skje, seier Herheim.
Paret var på veg frå Åndalsnes til Voss, men måtte vente i fleire timar før dei kunne komme seg heim att. Dødsulukka sette ein støkk i dei begge to.
– Vi køyrer ofte gjennom tunnelen. Det er viktig å følge godt med når ein køyrer her, seier dei to samstemt.
Lange køar på E16
Lærdalstunnelen var stengd i fleire timar etter ulukka for trafikk, og det var meldt om lange køar på begge sider av tunnelen.
Gudvangatunnelen var delvis stengd som følge av ulukka i Lærdal, men er no open att.
– Trafikken gjennom Gudvangatunnelen vil gå som normalt fram til køen etter ulukka er vekk, seier trafikkoperatør ved Vegtrafikksentralen i Lærdal, Roger Nedberge Hille.
E16 i Lærdal var tidlegare på dagen stengd ved Ljøsne etter ei trafikkulukke.