NRK Meny
Normal

No er også lærarar på denne skulen i streik

I dag vert lærarstreiken trappa opp. Frå i dag er til saman 164 medlemmer i Utdanningsforbundet i Førde i streik.

Øyrane vidaregåande skule i Førde

ELEVANE MÅ MØTE: Lærarar ved Mo og Øyrane vidaregåande skule er tekne ut i streik.

Foto: Kjell Arvid Stølen / NRK

Frå før har Førde ungdomsskule, Halbrend skule og Hafstad vidaregåande skule streika i halvanna veke. Men i dag råkar også streiken Mo og Øyrane vidaregåande skule og Førde Norsksenter.

Rektor Liv Horvei ved Mo og Øyrane vidaregåande skule seier elevane likevel må møte på skulen.

Liv Horvei

- ELEVANE MÅ MØTE: Rektor Liv Horvei.

Foto: Stine Kyrkjebø Johansen / NRK

– Klassane er ulikt råka, alt etter kva lærarar som er tekne ut i streik. Det gjeld begge skulestadene våre, både Øyrane og Mo. Elevane har fått beskjed om å møte opp til dei timane der det er lærar.

To lærarar til tekne ut måndag

Men ho kan ikkje pålegge elevane å halde seg på skulen i dei timane dei ikkje har lærar.

– Kan det bli aktuelt å stenge skulen heilt dersom dette held fram?

– Det må vi ta etter kvart. No har vi fått varsel om at to lærarar til på Mo blir tekne ut frå måndag, og då går det særleg hardt ut over klassane der. Vi må ta det fortløpande og håpe på at partane blir samde så fort som mogeleg.

Foto: Eli Eikenæs Vengen, NRK

STREIK: Rektor Liv Horvei ved Øyrane vidaregåande skule, elev Jannicke Roaldstveit Haukedal og Sissel Sande i Utdanningsforbundet blir intervjua av Eli Eikenæs Vengen.