I språkbruksplanen står det at det er «vi» og e-ending i infinitiv som er rett språkbruk for dei tilsette.
Sogningane bør få skriva det som er naturleg for dei, seier rektor ved Sogndal vidaregåande skule, Marta Sofie Vange.
– Me syntest at planen er god, men så vart me veldig skuffa då me såg at det stod at me ikkje skulle skriva me lenger, og ikkje a-infinitiv. Begge delar er heilt naturleg å skriva for oss i Sogn
I går fortalde NRK om språkreglane til Sogn og Fjordane fylkeskommune, der det mellom anna står: «I fylkeskommunen nyttar vi VI (ikkje ME) i all offisiell korrespondanse».
- LES OGSÅ:
- LES OGSÅ:
Vil ha endra reglane
At det blir innført så strenge reglar overraskar norsklærarane og rektor Vange.
– Det er ingen som har gitt oss påpakning for at me skriv me og a-infinitiv til denne tid. Eg er ikkje sikker på om dei har tenkt godt nok gjennom dette.
Difor har norsklærarne ved Sogndal vidaregåande sendt brev til fylkeskommunen for å få reglane endra.
Planen er ikkje politisk handsama, og det trengst heller ikkje, meiner medlem i fylkesutvalet for kultur og førsteamanuensis i norsk, Jan Olav Fretland. Han synest planen er god, men han skjønar at det kjem reaksjonar.
– Det kan henda at ein burde vurdera å mjuka litt opp på dette punktet, men nynorsken har bruk for eit slikt einskapeleg bilete. Det er ikkje sikkert at det alltid er ein fordel at nynorsken skal blomstra i alle retningar. Me har og bruk for eit fast skriftbilete.
– Gjeld ikkje for politikarar
Ifølgje Marta Sofie Vange er det også uklart om reglane gjeld for fylkeskommunalt tilsette lærarar, eller berre dei som arbeider i administrasjonen. Fretland er klar på at dei ikkje gjeld han sjølv og andre politikarar.
– Når eg som lærdøl kjem med eit framlegg i fylkestinget vil det vera skrive med me og a-infinitiv, og slik må det vera. Eg kjem å gjera det til handa mi sluttar å virka.