Rådmann Oddbjørn Ese peika i går på kutt på over fire millionar kroner berre innan oppvekst i kommunen. Det kan bety nedlegging av skuletilbod både i Framfjorden, Vangsnes, Feios og Fresvik.
Orkar ikkje meir
Rektor ved Fresvik skule, Jarle Christensen, fortel at rykta om kutt har gått i lengre tid, og at somme lærarar ikkje orkar meir:
- Dei er så usikre på framtida at dei rett og slett ikkje maktar å forhalde seg til det.
Vik kommune må kutte 25 millionar kroner årleg dei neste fire åra, på grunn av utrekna tap på over 90 millionar kroner etter Terra-skandalen.
Tøff tid
Utdanningsforbundet varslar kamp mot skulekutta i Vik. Lokallagsleiar Ole Jørgen Øygarden seier at det er ei tøff tid for mange i skulen.
Ordføraren i Vik, Marta Finden Halset, understrekar at kuttlista som rådmannen la fram på kommunestyremøtet i går er ei såkalla arbeidsliste som politikarane skal handsame. Ho vil ikkje kommentere at lærarar i Vik rømmer frå skulen.