Etterlyser fleire kvinnelege nominerte til gründerprisen

4. november blir det avgjort kven som blir kåra til årets gründer i Sogn og Fjordane, men ingen av dei fem nominerte er kvinner.

Sidan 2012 har det vore 25 finalistar i kampen om gründerprisen, men berre tre av desse har vore kvinner. I 2014 vann Heidi Aabrekk prisen, som einaste kvinne i utdelinga si historie.

Ho åtvarar mot at ein einsidig hyllest av dei typiske vekstbedriftene, kan setje kvinnelege gründerar i skuggen.

– Det er mange kvinner som satsar på ein annan måte enn menn og utviklar selskap innan meir tradisjonelle verksemder som kafear og overnattingsplassar, bær og frukt, og andre viktige næringar, som kanskje ikkje har det spesielt innovative preget over seg, seier ho.

• Les også: Kven blir årets gründer?

– Har ikkje leita etter kvinner

Frå næringshagen på Sandane driv Aabrekk selskapet Intempo saman med to andre tilsette. I 2014 vann ho gründerprisen for den såkalla bravo-leiken, som er ein pedagogisk metode for born mellom 0 til 3 år.

Sidan ho vann prisen har det ikkje vore ein einaste kvinneleg nominert til prisen.

Trond Teigene er jurymedlem og administrerande direktør i Sparebanken Sogn og Fjordane. Han innser at det er for få kvinner som er blitt nominert.

– No er det slik at det er ope for alle å foreslå kandidatar. Vi har ikkje leita etter kvinner, men etter dei beste bedriftene. Men det er ein god og rett observasjon at det er veldig overrepresentert av mannlege gründerar, seier han.

• Les også: Utvikla ny barnepedagogik – kåra til årets gründer på Vestlandet

– Fint at temaet kjem opp

Tal frå Statistisk sentralbyrå frå 2014 viser at 37,8 prosent av etablerarar av personleg eigde føretak i Noreg var kvinner, medan berre 20,2 prosent kvinner etablerte aksjeselskap.

Teigene er ikkje sikker på kvifor juryen ikkje har klart å finne fleire kvinnelege finalistar dei siste åra.

– Eg tykkjer det er fint at temaet kjem opp. Det gir oss ein moglegheit til å i neste omgang oppfordre folk til å foreslå kvinnelege gründerar. For det er ikkje tvil om at det også finst flinke, kvinnelege grundera i fylket, fortel han.

• Les også: – Dette har internasjonalt potensiale, trur milliardærinvestor

Blir ikkje millionær

Historiene om gründerar som har blitt både millionærar og milliardærar av ideane sine er mange, men Aabrekk tenkjer annleis.

– Skulle eg blitt mangemillionær hadde eg vald noko anna, ler ho.

– Eg har vanleg spesialpedagoglønn og det har aldri vore noko overskot i selskapet. Det er klart at det er eit mål for alle bedrifter å tene pengar, og vi ønskjer å bli berekraftige på sikt, men det er heilt klart hos ungane mitt engasjement ligg, seier ho.