Deltakarar og publikum under festivalen blei vitne til at ein av deltakarane på frikøyringstevlinga i Frudalen datt og skada seg på veg ned frå ei svært bratt fjellside.
– Det er ei som har skada seg ganske høgt oppe i bakken. Helikopteret har kome og skal hjelpe til å få ho ned. Det var rett og slett for bratt til å få ho ned på nokon annan måte, fortel rennsjef Henriette Landro til NRK.
Redningshelikopteret blei sendt frå basen i Florø og var raskt på plass for å hjelpe den skadde kvinna.
– Det ser ut til at det har gått bra og at alt er under kontroll, seier Landro.
Festivalen har blant anna tinderettleiarar og Røde Kors-folk som sikrar tryggleiken i området for deltakarar og publikum.
– Det var mange som kom raskt til staden då ho skadde seg, seier rennsjefen.
Kvinna skal ikkje vere alvorleg skadd.