- Det er det største eg har vore med på, seier ein stolt og lukkeleg sirkusgeneral Svein Arild Vatsø.
Laurdagskveld var 1200 personar frå Bremanger samla i Bremangerhallen for å få med seg kanskje det mest uvanlege kulturarrangementet kommunen har hatt.
- Årtusenets bygdefest
- Det var så mykje glede blant alle etterpå. Eg trur alle er stolte over at dei kjem frå Bremanger etter å ha sett noko slikt.
Til saman 278 kulturaktørar frå heile kommunen, 40 tonn med utstyr, storskjermar som viste live bilete. Alle effekter vart tekne i bruk for å gjere Sirkus Bremanger til ei storhending som aldri vil gå i gløymeboka for dei som bidrog eller hadde løyst billett.
Ville drepe bygdedyret
- Det er eit bygdedyr her i Bremanger, men avstanden mellom folk vert mindre med den festen her. Det har vore eit felles kulturløft der så mange har bidrege. Representantar frå heile kommunen har drege lasset i lag.
Mykje av målet bak festkvelden var å samle ei kommune som er svært oppdelt. Dårlege kommunikasjonar og få ferjeavgangar gjer at samhaldet i kommunen kan bli sett på prøve.
Vatsø ville samle så mange kulturaktørar i kommunen som råd, i tillegg til utflytta profesjonelle musikarar. Tanken er at om ein får til noko i lag vert den mentale avstanden mindre.
- Sjølv eg som bur her og er frå Kalvåg kjenner nesten ikkje folk frå Svelgen, seier 27-åringen.
Unikt arrangement
Sirkus Bremanger romma heile 30 innslag frå ei scene på over 200 kvm inne i Bremangerhallen. Forventningane var skyhøge, men Vatsø fortel om publikum som både vart stolte og rørte. Programmet var hemmeleg heilt fram til opninga som eit reint marknadsføringstriks.
- Dette har vore eit felles kulturløft og tilbakemeldingane har vore fantastiske
Overskot tilbake til lokalsamfunnet
- Målet har vore å lage eit helsikes show. Overskot og økonomi har ikkje vore målet, og pengane frå overskotet vil gå til Bremangerhallen, seier Vatsø.
- Vil dette gjentakast?
- Arrangementet skal i alle fall evaluerast skikkeleg. Vi vurderer også å selge ein dvd-film av festen. Det fristar til gjentaking, men dette går ikkje kvart år, det seier nesten seg sjølv.