Kritisk til satsinga på barnehage - meiner politikarane må få opp farta

– Barnehagane våre treng fleire pedagogar og dei treng fleire tilsette, seier Aud Marie Stundal.

Ho er instituttleiar for barnehagelærarutdanning på Høgskulen i Sogn og Fjordane og meiner politikarane ikkje har gjort nok for å betre situasjonen.

Etterlyser meir handling frå politikarane

For i dag manglar det over 4000 med barnehagelærarutdanning i Norge. Då den raudgrøne regjeringa innførte full barnehagedekning i 2013, utsette dei samtidig krava til bemanning i barnehagar heilt til 2020. Målet er å ha ein vaksen for kvart tredje av dei minste barna, og ein vaksen per seks større barn.

Stundal legg ikkje skjul på at ho meiner politikarane på Stortinget må få ut fingeren. Ho seier det er behov for fleire faglærte i barnehagane no med det same, å vente til 2020 er for lenge.

– Ei regjering må ha eit meir offensivt mål, seier ho og held fram:

– Dette handlar om kva signal vi gir til ungdomen. Om vi vil at ungdomen skal velje barnehagelærarutdanninga kan vi ikkje gje signal om at det skal kome ei bemanningsnorm først i 2020, seier ho oppgitt.

Det er heller ikkje sett i verk konkrete tiltak for korleis ein skal få fleire med pedagogisk utdanning til barnehagane.

• LES OGSÅ: Vil straffe barnehager økonomisk
• LES OGSÅ: Stor mangel på førskolelærere

Ni av ti born har full plass

Sist veke fortalde NRK at ni av ti born i Norge er meir enn førti timar i barnehagen kvar veke. Frå 2009 til 2012 har talet born som har heiltidsplass gått opp frå 83 til 90 prosent, viser tal frå Utdanningsdirektoratet.

Dette viser kor viktig det er å få inn fleire med god utdanning, seier Stundal.

– Det seier seg sjølv at i den augneblinken du får fleire ungar i barnehagen og dei er der lenger, og du ikkje har ei statleg bemanningsnorm, så vil presset bli større og arbeidskvardagen endå meir hektisk, seier ho.

• LES OGSÅ: Brukar stadig meir tid i barnehagen
• LES OGSÅ: Oslo refses for dårlig barnehagekvalitet

(Artikkelen held fram under biletet)

– Eit steig i rett retning

Ei av fanesakene til Sosialistisk Venstreparti då dei sat i regjering var nettopp full barnehagedekning. Samtidig var dei også med å utsette krava til bemanning til 2020.

Torgeir Knag Fylkesnes, utdanningspolitisk talsmann i SV, seier krava vart sett til 2020 fordi det har vore ei enorm barnehageutbygging dei siste åra.

– Når vi får mange fleire tusen barnehageplassar og ei slik enorm utbygging vil det vere vanskeleg å halde tritt med rekrutteringa, men også gjennomføringa av utdanninga som rettar seg mot barnehagane, seier Knag Fylkesnes til NRK.no.

Han påpeikar at rekrutteringa av barnehagelærarar ikkje har gått ned, sjølv om det har blitt langt fleire barnehagar i Norge.

Sjølv om SV ønskte at 50 prosent av dei tilsette skal vere fagutdanna, fekk dei ikkje gjennomslag for dette i den raudgrøne regjeringa.

– Vi fekk gjennomslag for fleire vaksne per barn, så det var iallfall eit steg i rett retning, seier SV-politikaren.

No vil han følgje nøye med på kva den blå regjeringa vil gjere.

– Eg er veldig spent på kva ambisjonsnivå dei har for barnehagane. Til no har dei vist eit lågare ambisjonsnivå enn den raudgrøne regjeringa hadde, seier Knag Fylkesnes.

• LES OGSÅ: Barnehager melder ikke fra om omsorgssvikt og mishandling
• LES OGSÅ: Kjønnsdelt barnehage får likestillingsmidler

Håpar å nå målet lenge før

Også dagens regjering har sagt at kravet til bemanning i barnehagane skal setjast til 2020. Birgitte Jordahl, statssekretær for Høgre i Kunnskapsdepartementet seier det er feil at dei ikkje har noko ambisjonsnivå.

Dei har nemleg mål om å nå målet lenge før.

– Vi har eit mål om å nå dette lenge før den tid. Difor må vi gå gjennom alle dei tiltaka vi har sett i gang og sjå på effekten av dei, for så å justere dei undervegs, seier ho.

• LES OGSÅ: – Må få lønn på nivå med ingeniører
• LES OGSÅ: Stor sprik i tallet på barnehageledere med utdanning

Vil gjere yrket meir attraktivt

Jordahl seier den blå regjeringa kjem til å køyre fleire kampanjar for å rekruttere folk til barnehagelærarutdanningane. Eit område dei satsar mykje på, er etterutdanning av dei som allereie jobbar i barnehagen.

– Eg vil tru det kan gjere det å jobbe i barnehage meir attraktivt, seier ho.

Aud Marie Stundal, instituttleiar for barnehagelærarutdanning på Høgskulen i Sogn og Fjordane, meiner det viktigaste er å gi yrket høgare status.

– Det viktigaste er å gi tydelege signal slik at det blir snakka positivt om barnehageyrket, seier ho.