Det skriv næringslivsavisa E24.
Qatalum er eit av verdas største aluminiumsverk og opna i 2010. Hydro eig halvparten av verket.
No har verket fått problem etter at hittil seks land har brote den diplomatiske kontakten med Qatar. Landa skuldar Qatar blant anna for å stå bak hackarangrep og huse terroristar. Fleire flyselskap har innstilt all trafikk til og frå landet, og Saudi-Arabia har sagt at dei vil stengje grensa til landet.
Fryktar forseinkingar
Mykje av transporten til og frå aluminiumsverket går via hamna Jebel Ali i nabolandet Dubai, som har stengt hamna for all transport av varer til og frå Qatar. I første omgang råkar dette transporten av ferdige produkt frå Qatalum.
– No må vi finne alternativ til denne hamna. Det viktigaste er å unngå forseinkingar, eller i alle fall syte for at forseinkingane ikkje blir større enn nødvendig, seier visepresident for kommunikasjon Erik Brynhildsbakken i Norsk Hydro til E24.
Hamstrar matvarer
Fleire medium melder i dag at innbyggjarane i landet har byrja å hamstre matvarer av frykt for langvarig stenging av grensene.
Det er berre ein liten handfull nordmenn som jobbar ved Qatalum, der produksjonen går som normalt.
– Vi har ikkkje informasjon som tilseier at det er behov for ekstra tryggleikstiltak overfor dei norske ved Qatalum, men vi er i tett dialog med norske styresmakter og følgjer deira tilrådingar dersom situasjonen skulle endre seg, seier Brynhildsbakken til NRK.
