I helga var Kristeleg Folkeparti Sogn og Fjordane samla til årsmøte. Også her var det langt mellom dei unge.
Erland Fagermoen er tidlegare ordførar i Balestrand og medlem i fylkestinget i 20 år.
Han er 71 år, men var slett ikkje åleine i sin årsklasse på Kristeleg Folkeparti sitt fylkesårsmøte i helga. Det var få unge andlet å spore i salen.
– Det er fleire årsaker til det. Vi rekrutterer mykje frå kristne ungdommar, og dei kristne ungdommane har ei målsetjing som går mykje på det frivillige organisasjonslivet også, seier Fagermoen.
- LES OGSÅ:
Mange vert engasjerte i andre saker
Han peikar på at mange av dei gjer ein stor innsats i forskjellige misjons- og hjelpeorganisasjonar.
– Dei har eit høgt idealistisk nivå. Vi skal konkurrere mot det, seier Fagermoen.
Snittalderen på norske partimedlem har auka jamt dei siste åra, frå 50 år i 1989 til 56 år i 2009. No er berre seks prosent av medlemmene mellom 18 og 30 år.
KrF har dei eldste medlemmene i landet, med ein snittalder på 62 år. Berre to prosent av KrF sine medlemmar er mellom 18 og 30 år.
- LES OGSÅ:
Har vore ein trend over tid
Statistikken kjem frå prosjektet «Politiske partier i moderne demokratier», ved institutt for Statsvitskap ved Universitetet i Oslo. Det er leia av Knut Heidar.
– Det har vore slik lenge at KrF har hatt ein litt eldre profil, både når det gjeld medlemmer og veljarar, enn partia elles. Det kan hengje i hop med forankringa i religiøse organisasjonar, som har mykje å seie for deltaking og aktivitet. Den kjem noko seinare, seier Heidar.
Han peikar på at dei unge også er opptekne med studium og utdanning.
– Ein er også ganske mobil i den alderen, og det har nok også noko å seie for KrF, trur Heidar.
Trur utfordringa er å verve dei som kjem heim
Ein ung KrF-ar som fell i den kategorien er 21 år gamle Tore Storehaug frå Askvoll. Han er nestleiar i KrFU, partiet sin ungdomsorganisasjon.
Han studerer i Oslo og trur utfordringa for KrF vert å verve ungdomen som vel å kome heim.
– Vi er kanskje ikkje gode nok til å sjå på dei som kjem tilbake etter at dei har teke utdanning andre stadar, dei som held på å slå seg ned og starte familie, seier Storehaug.
– No er det vanleg å reise ut for å ta utdanning. Og så er det veldig mange av oss som har eit ønskje om å komme tilbake til alle dei gode tinga ein har i Sogn og Fjordane. Men då er det ofte sterke ressurspersonar som kjem, og dei vert fort veldig opptekne, seier Storehaug.
Han trur dei må vere litt flinkare i partiet til å prøve å få tak i desse personane.
Må syne dei unge at det nyttar
Partileiar for KrF i Sogn og Fjordane, Trude Brosvik trur partiet har gode saker for å lokke ungdom, men meiner fokuset har vorte feil.
– Det er ein del bilete som vert teikna av KrF, at vi er anti-homofile, at vi ikkje vil tillate abort, til dømes. Det er krevjande å forklare for ungdom kva partiet vårt eigentleg står for, seier Brosvik.
Partiveteran Fagermoen meiner ungdomsorganisasjonen må få sine sigrar i partiet. Slik vil også ungdom utanfor sjå at det nyttar.
– At det då vert vidareformidla til resten av ungdommen, slik at dei ser at det er moglegheiter her. Eg trur kanskje det er ein måte å gjere det på, seier Fagermoen.