– Det er klart eg blir uroa. Fylkesmannen i Sogn og Fjordane er ein stor arbeidsgivar i Leikanger og betyr mykje for lokalsamfunnet, seier leikangerordførar Jon Håkon Odd (Ap).
Allereie neste år kan fylkesmannsembetet i fylket vera historie (sjå faktaboks). Kommunalminister Jan Tore Sanner (H) har nemleg starta eit arbeid som kan bety at mange av dagens 17 fylkesmannsembete blir slått saman på nyåret.
- Les òg:
– Feil rekkefølgje
Ingenting er bestemt, men ordførar Odd er kritisk til at Regjeringa kan koma til å vedta fylksmannsfusjonar, før Stortinget neste vår skal handsama regionreforma:
– Dette skjer i feil rekkefølgje. Eg er kritisk til at regjeringa prøver å leggja føringar for regionreforma ved å banka ein ny fylkesmannsstruktur fyrst.
Verken Sanner eller andre i den politiske leiinga i Kommunal- og moderniseringsdepartementet kan kommentera saka i påska.
VIKTIG MED NÆRLEIK TIL KOMMUNANE: Fylkesmann Anne Karin Hamre meiner det er avgjerande å ha eit fylkesmannsembete i Sogn og Fjordane òg i framtida.
Foto: Noralv Pedersen / NRKMen Sanner ønskjer som kjent færre og sterkare kommunar – og fylkeskommunar. Blir det mange samanslåingar, meiner han at behovet for rettleiing frå fylkesmennene blir mindre.
Men i Sogn og Fjordane kan framleis trongen for rettleiing vera til stades: 22 av totalt 26 kommunar har skrive under på intensjonsavtalar for nye storkommunar, men alle samanslåingane treng ikkje bli ein realitet, sa fylkesmann Anne Karin Hamre i førre veke.
Førde husar 24 fylkesmannsarbeidsplassar
Hamre møtte for ei veke sidan fylkesordførar Jenny Følling. Der drøfta dei mellom anna det utsette fylkesmannsembetet i Sogn og Fjordane. Etter møtet var Følling uroleg:
– Det kan vera eit nytt bein som blir plukka vekk frå fylket.
Leikanger har dei fleste av dei 135 fylkesmannsarbeidsplassane i Sogn og Fjordane, men også Førde er vertskap for 24 årsverk.
Førdeordførar Olve Grotle ønskjer ikkje å bli intervjua om saka, fordi han kjenner ho mest frå omtale i media.
Men Grotle skriv i ei tekstmelding at han er samd med fylkesmann Hamre når ho peikar på at «me må ha ei offensiv haldning i saka og krevja at fylket vårt må koma ut av prosessen med minst like mange offentlege arbeidsplassar som i dag – og at vi må forventa fleire nasjonale oppgåver til Vestlandet.»
ULIK TILNÆRMING: Fylkesordførar Jenny Følling (til høgre) har hatt møte med fylkesmann Anne Karin Hamre om fylkesmannsembetet som er i spel. Førdeordførar Olve Grotle (t.v.), som er vert for 24 fylkesmannsårsverk, kjenner saka mest frå omtale i media.
Foto: Erlend Blaalid Oldeide / NRKUnike nasjonalt
– Fylkesmannen spelar ei viktig rolle som regional utviklingsaktør i Sogn og Fjordane, seier Jon Håkon Odd
I eit fylke der kommunane har relativt små administrasjonar, meiner leikangerordføraren at Sogn og Fjordane treng ein fylkesmann som gir kommunane viktig utviklingshjelp og rettleiing.
– Der er Fylkesmannen i Sogn og Fjordane unike nasjonalt. Der dei andre embeta er meir opptekne av tilsyn og kontroll, er fylkesmannen her mykje flinkare til å syta for vekst og utvikling i fylket, seier Odd.
