Ein stor del av industrien i Sogn og Fjordane får deler av omsetnaden sin frå petroleumsnæringa. Det viser tal frå det nye næringsbarometeret, som vert presentert i Sogndal 15. januar.
– Det er veldig viktig, ikkje minst i høve leverandørindustrien som spreier seg over heile fylket. Det er klart at den hovudaktiviteten som går føre seg på basen i Florø er jo sentral. Dette er veldig viktig for Sogn og Fjordane, seier Jan Atle Stang.
Berre i år vil det bli investert 200 milliardar på norsk sokkel, men ein forsvinnande liten del av dette hamnar som inntekt for bedrifter i Sogn og Fjordane.
– Vi bør kunne forvente å få ein langt større del av dei store investeringane som skal skje rett utanfor stovedøra vår. Stikkordet er samarbeid mellom ulike aktørar, seier Stang.
- LES OGSÅ:
- LES OGSÅ:
Basen er viktig
Han peikar på at ein I Sogn og Fjordane har mykje kompetanse, men mange av aktørane er kvar for seg for små til å serve tenester for til dømes Statoil.
– Vi må få meir av inntektene og vi må få meir av arbeidsplassane knytt til petroleumsnæringa. Her har vi eit kjempepotensial, slår Stang fast.
Tala syner at 30 prosent av industriverksemdene i fylket leverer til oljenæringa. Dette er nesten like mange som i Hordaland med 35 prosent. Aktiviteten rundt basen i Florø har vore aukande, men knoppskytinga skjer også i randsona av basen.
Innan tenesteyting er det òg mange verksemder i Sogn og Fjordane som merkar oljeboomen. 18 prosent av verksemdene seier at dei har oljerelatert omsetnad.
- LES OGSÅ:
- LES OGSÅ:
Få arbeidsplassar
Men sjølv om ei av tre industriverksemder i fylket leverer til oljenæringa, er industrien i Sogn og Fjordane vesentleg mindre oljeintensiv enn i nabofylket i sør, går det fram av ei pressemelding.
Berre elleve prosent av industriverksemdene her i fylket får meir enn ein fjerdedel av omsetnaden sin frå oljenæringa, mot 24 prosent i Hordaland. Det er også eit faktum at Sogn og Fjordane har berre 1,7 prosent av arbeidsplassane i petroleumsnæringa her i landet.
Potensialet er difor stort når vi veit at 28 prosent av den samla oljeproduksjonen skjer utanfor kysten vår. Produksjonen i den nordlege delen av Nordsjøen er venta å halde fram i 30 år til.
Samarbeid gjev resultat
– Noko av utfordringa for fylket er at det finst mange små bedrifter med mykje god kompetanse, men som er for små til å kunne serve oljenæringa åleine, seier leiar for Statoil Florø, Sigurd Øistein Døsen.
Gode samarbeidspartar både i og utanfor fylket kan vere svaret for verksemder som ønskjer innpass hjå dei tunge aktørane i petroleumsnæringa.
– Dette vart løysinga til dømes løysinga for Østerbø Maskin og SafeClean i Høyanger. Saman har dei utvikla spesialutstyr til reinsing av oljerøyr på oppdrag for Statoil, heiter det i pressemeldinga frå Næringsbarometeret.