I 02.30-tida natt til laurdag vart politiet ringt opp frå eit hotell i Loen i Nordfjord.
To menn, ein i 20-åra og ein i 40-åra, hadde barka saman i slagsmål og laga bråk.
Spytta på politiet
Politiet reiste til staden og fekk tak i dei to, men den yngste av dei sette seg opp mot politiet.
Operasjonsleiar Espen Gulliksen ved politiet sin operasjonssentral i Florø seier mannen var utagerande og mellom anna spytta på politiet då dei ville ta han med seg.
– Dette er ikkje noko kjekt på oppleve, konstaterer operasjonsleiaren.
Etter eit lite basketak fekk politiet med seg mannen i 20-åra. Både han og mannen i 40-åra vart frakta til arresten i Førde.
Husbråk
Også andre stader i fylket er politiet sett i sving i vinternatta.
I 00.30-tida fekk politiet melding om husbråk på ei privat adresse i Florø. Politiet reiste til staden og fekk roa gemytta. Dei involverte var rusa.
Ei tid seinare måtte politiet hjelpe dei tilsette på ein serveringsstad i sentrum av Florø. Ein person var nekta å kome inn på grunn av uanstendig oppførsel. Den rusa personen vart køyrd heim av politiet.
Litt over klokka 02 i natt var det politiet i Sogndal som fekk besøk i patruljebilen. Ein rusa person hadde ramla og slått seg utanfor ein utestad. Vedkommande var å rekne som lettare skadd og fekk skyss heim.