Krangel mellom E16-kommunane

– Me meiner at dette høyringssvaret ikkje svarte direkte på det ein er bedt om.

Det seier Åshild Kjelsnes, varaordførar i Sogn og Fjordane Fylkeskommune og medlem av arbeidsutvalet til Stamvegutvalet.

Tidlegare denne månaden kom Stamvegutvalet med eit høyringsutsegn der dei talar på vegner av heile utvalet, som inkluderer Sogn og Fjordane Fylkeskommune og 16 kommunar langs E16. Aurland, Sogndal og Lærdal kommune er alle medlem.

– I ettertid av høyringssvaret er det fleire frå Sogn og Fjordane som meiner at ein ikkje svarte på det Regjeringa spurde om innspel til, seier Kjelsnes.

• Les også: Sogn og Hardanger saman for Hemsedalsfjellet

Har svart på alt

– Me meiner me har gått inn i oppgåva og svart på den, og at E16 er den naturlege nordlege traseen, seier Vidar Eltun, leiar i Stamvegutvalet.

Men er det ikkje slik at E16 ikkje er eit alternativ lengre?

– Regjeringa og vegvesenet har sagt at E16 ikkje er aktuelt, men Stortinget skal gjere eit vedtak til våren, og då er E16 framleis eit alternativ, seier Eltun.

Nådde ikkje fram

Stamvegutvalet sitt høyringsutsegn talar på vegner av dei tre fylkeskommunane og 16 kommunane som er representerte. Sjølv om nokre representantar arbeidde mot andre formuleringar i utsegna, og ikkje nådde fram, står deira kommune på lista av sendarar.

– Eg som sit i arbeidsutvalet har forsøkt å påverke høyringsuttalen til Stamvegutvalet, men har ikkje greidd det, seier Jan Geir Solheim, ordførar i Lærdal kommune.

Han meiner utvalet burde ha teke til orde for riksveg 52 over Hemsedalfjell i utsegna.

– Det blir feil å levere ein uttale frå Stamvegutvalet utan å nemne fortrinna av å nytte riksveg 52, difor har me reagert, seier ordføraren.

Har fått moglegheita til å påverke

– Eg føler at kritikken blir litt feil, i og med at dei fekk tilbod om å komme med endringar, seier Eltun.

Heile Stamvegutvalet har blitt invitert på telefonmøte.

– Det var nokre av oss som ikkje hadde anledning til å vere med på (det siste) telefonmøtet, og me ikkje fekk gehør for andre synspunkt, seier Åshild Kjelsnes.

Det har vore opent for å komme med endringsforslag, fortel Eltun.

– Men sidan ingen endringsforslag kom inn innan fristen, sende me høyringssvaret ut på vegner av Stamvegutvalet.

– Vår haldning til dette er å fremje E16 sine interesser, og ikkje ta valet mellom rv. 7 eller riksveg 52, avsluttar Eltun.

Stortinget skal gjere vedtak om vegen i juni 2017.