Køyrde i 144 km/t i 60-sona – no har 20-åringen fått straffa

Det var i midten av juni at Utrykkingspolitiet stoppa mannen på Bjørvikstranda på fylkesveg 57 i Gaular. Farta vart målt til 144 km/t på strekninga der det er 60-sone.

I dommen frå Sogn og Fjordane Tingrett står det at mannen tilstod råkøyringa i retten og det har gitt han litt lågare straff.

Likevel må han sone 36 dagar i fengsel og han er fråteken retten til å ha førarkort i tre år frå den dagen førarkortet vart tatt. Han må også ta ny førarprøve før han kan få førarkortet tilbake.

I eit intervju med NRK like i etterkant av fartskontrollen han vart tatt i var det ein angrande 20-åring som sa at det ikkje var greitt å køyra så fort som han gjorde.