Hadde berre 4 timar og 45 minuttar kvile på 24 timar køyring - skulle hatt minimum ni timar

– Han køyrde alt han hadde lov til på sitt eige kort, og så hadde han med

sjåførkortet til ein kollega. Når han ikkje kunne køyre lenger på sitt eige kort og hadde brukt opp tida si, så sette han inn kortet til kollegaen sin, og så heldt han fram køyringa, registrert som ein annan person, seier avdelingsingeniør i Statens vegvesen, Torgeir Bang.

Sjølv om sjåføren, som er polsk, men køyrer for eit norsk selskap, nytta seg av to sjåførkort, er det ingen heksekunst for kontrollørane til Vegvesenet å finne ut kor lenge han hadde køyrt.

• LES OGSÅ: – En trussel for alle som ferdes på veien
• LES OGSÅ: Aksjonerte mot sosial dumping på veiene

Får ut all aktivitet

– Vi kan ta ut all aktivitet på køyretøyet. Det registrerer alt som skjer, uansett kven som køyrer. Vi får ut all køyringa han har gjort, og så må vi klare å bevise at det er han som har køyrt, og ikkje kollegaen. Men når kollegaen ikkje er med i bilen, og dei kjem frå eit land som er langt vekk, så skal det vel noko til om det er kollegaen som har køyrt, seier Bang.

Sjåføren gjekk med på at det var han som hadde køyrt.

Han understrekar at dette er svært alvorleg.

– Når det gjeld trafikktryggleik, så er det forferdeleg dumt. Det er ein person som køyrer begge delane. Så han har hatt ein særdeles kort døgnkvile på 24 timar, og har vore på jobb veldig, veldig lenge. Det er farleg, rett og slett, seier Bang.

• LES OGSÅ: Hver fjerde trailer fikk ikke kjøre videre
• LES OGSÅ: Kontrollane er tidkrevjande og vanskelege - men Vegvesenet lovar å følgje opp

Er ille, men har sett verre

– Dette er ille, veldig ille. Men vi har sett verre. Vi har også sett same teknikken for å skjule brota sine, og kanskje endå grovare brot på kviletida i døgnet, seier Bang.

Ein annan sjåfør vart natt til tysdag stoppa på grunn av kabotasje.

– Han som er teken for kabotasje, har ikkje den dokumentasjon som skal til for at han skal få lov til å drive kabotasjetransport i Norge, seier Torgeir Bang i Statens vegvesen.

Kabotasje er transport mellom stadar i eit anna land enn der transportøren høyrer heime. Ein utanlandsk transportør kan berre frakte gods eller personar mellom to stadar i Norge dersom det er spesielle grunnar for det.

Transportørar frå EØS har likevel tilgjenge til å utføre mellombels kabotasje i Norge. Men det er vilkår som må liggje til grunn.

Kabotasjen må utførast med same køyretøy som vart brukt for den internasjonale transporten inn i landet. Det kan utførast maksimalt tre kabotasjeturar etter den internasjonale transporten inn i landet. Lossing etter den siste kabotasjeturen skal finne staden innan sju dagar etter at den internasjonale lasta vart levert.

• LES OGSÅ: Næringa får diskutere omstridd problemstilling med ministeren
• LES OGSÅ: Skal finne ulovlig transport

Fekk totalt 32.000 i bot

I ein kontroll må sjåføren ha dokumentasjon på det dei har gjort tidlegare, og den må vere korrekt.

– Det hadde ikkje sjåføren, så då vart han politimeld. Han får heller ikkje lov til å fullføre lasset sitt, seier Bang.

Dei to sjåførane måtte tilbringe natta på Håbakken, i påvente av at politiet utferdinga bøter til dei. Konstituert lensmann i Lærdal og Aurland, Per Tomas Klingenberg, leverte dei bøtene i føremiddag.

– Juristen har sett på saka. Han som er stoppa for kabotasje, har fått 20.000 kroner i bot, og han som har brote køyre- og kviletida, har fått 12.000 kroner i bot, seier Klingenberg.

• LES OGSÅ: Tel alle norske og utanlandske vogntog
• LES OGSÅ: Stoppa vogntog som dreiv ulovleg godstransport

Må køyre tom ut av Norge

Sjåføren som vart stoppa for kabotasje, er polsk og køyrer for eit polsk firma. Mannen som har brote køyre- og kviletida, er frå Aust-Europa, men køyrer for eit norsk selskap.

Bilane måtte stå på Håbakken i natt, fram til Klingenberg kom med bøtene deira tysdag føremiddag.

– Vi fekk politimeldingane i løpet av natta. Den eine av sjåførane måtte ta døgnkvil. Han andre må berre vente på at han får lasta om, slik at han kan køyre tom ut att av Norge, seier Klingenberg.